बुनियादी सुविधा मन संग लोगन के जीवन स्तर ल पोठ करना सरकार के प्राथमिकता: मंत्री श्री रविन्द्र चौबे साजा क्षेत्र ल दीन 6.58 करोड़ रूपिया के विकास कार्य के सौगात

रइपुर, 31 अगस्त 2021 मंगल। कृषि अउ जल संसाधन मंत्री श्री रविन्द्र चौबे ह कृष्ण जन्माष्टमी के अवसर म साजा क्षेत्र के लोगन मन 6 करोड़ 58 लाख 27 हजार रुपिया के अबड़ अकन विकास कार्य के सौगात दीन। बाजार चौक साजा म आयोजित भूमिपूजन अउ लोकार्पण कार्यक्रम ल सम्बोधित करत कहीन कि छत्तीसगढ़ सरकार निर्माण कार्य के संगे-संग लोगन के जीवन स्तर म सुधार अउ उन ल आत्मनिर्भर बनाए के उदीम करत हावय। सरकार के ये इच्छा हवय कि लोगन ल शिक्षा, स्वास्थ्य, सड़क, सिंचाई आदि के सुविधा मन के संगे-संग उन्कर आर्थिक स्थिति पोठ करना हे। एकर बर निर्माण कार्य मन के संग कृषि अउ आजीविका ल पोठ करे बर अबड़ कन कार्यक्रम के माध्यम ले किसान, ग्रामीण, पशुपालक मन सोज्झे मदद देहे जावत हे। एकर छोड योजना मन के तहत ग्रामीण इलाका के भूमिहीन परिवार मन के संग-संग नाउ, धोबी, लोहार अउ पौनी-पसारी के काम करइया लोगन मन तको लाभान्वित करे जाही।
कृषि मंत्री श्री रविन्द्र चौबे ये बेरा म साजा के वार्ड क्रमांक-12 म निर्मित मंगलभवन, वार्ड-13 म स्व श्री नान्हर राम साहू सामुदायिक भवन अउ वार्ड क्रमांक-15 म यादव भवन बर निर्मित अतिरिक्त कमरा के लोकार्पण करीन। 95.08 लाख रूपिया ले बनइया नगर भवन, 2 करोड़ 12 लाख 30 हजार रूपिया के लागत ले जल प्रदाय योजना के पाईप लाईन विस्तार कार्य, 2 करोड़ 15 लाख 43 हजार रूपिया के लागत वाले शासकीय कन्या हाई स्कूल अउ बालक हाई स्कूल निर्माण कार्य, वार्ड-02 म 19.11 लाख रूपिया के लागत ले गौठान निर्माण, पौनी पसारी योजना के तहत वार्ड-01 म 26.35 लाख के लागत ले बाजार निर्माण अउ 50 लाख रूपए के लागत ले अधोसंरचना मद के तहत अबड़ अकन निर्माण कार्य, वार्ड क्रमांक 02 म 40 लाख रूपिया के लागत ले खेल मैदान के उन्नयन कार्य के भूमिपूजन करीन।