- गांव वाले मन ह करिन अतका पैरादान के अब रबी फसल तक चारा के चिंता नइ हे
- आंदोलन के जइसे मनखे मन ह अपनाइन, खुद ट्रैक्टर ले गौठान तक छोड़े आइन
- एखर ले पहिली उपयोग बर रखके बाचे पैरा जला देवत रहिन, अब इंकर उचित उपयोग हो पाही
दुर्ग, धान खरीदी के अवसर म जामगांव एम पहुंचे मुख्यमंत्री श्री भूपेश बघेल ह गांव वाले मन ले अपील करे रहिन कि गौठान आप मन के अपन हे। अपन पशुधन संवर्धन बर, फसल ल बचाय बर पैरादान बर आगू आवव। एकर असर आज पूरा जिला भर म महसूस होइस। सबो गांव मन म गांव वाले मन ह मुक्तहस्त ले पैरादान करिन। मंझनिया दू बजे तक गौठान मन म 1119 क्विंटल पैरा सकला गए रहिस। सोमवार के कलेक्टर श्री अंकित आनंद ह सरकारी अमला ल घलोक निर्देशित करे रहिन कि ये काम बर व्यापक स्तर म जनजागरूकता फैलाव अऊ गांव वाले मन के यथासंभव मदद करव। आज स्थानीय अमला ह पूरा समय गांव वाले मन के संग चर्चा करिन। गांव भर म मुनादी कराए गीस। आज सीईओ जिला पंचायत श्री कुंदन कुमार घलोक सबो गौठान वाले गांव मन म गीन। उमन मनखे मन ले आग्रह करत कहिन कि गौठान म पशु मन बर जतका जादा चारा रहिही, ओतकेच मवेशी मन कोति ले फसल नष्ट होए के खतरा घट जाही। एकर सीधा लाभ गांव वाले मन ल ही मिलही। जऊन गांव मन म गौठान मन म पशु रखे गे हे, उहां के फसल सुरक्षित रइही। इहां कंपोस्ट खाद के उत्पादन घलोक शुरू हो गए हे। जैविक खाद के डिमांड मार्केट म बहुत जादा हे। सीईओ आज पंचायत मन के बैठक म घलोक गीन जऊन विशेष रूप ले मनखे मन ल पैरादान बर प्रेरित करे बर बलाए गए रहिस।
ग्रामीण खुदे आगू आवत हें पैरादान बर -जामगांव एम जिहां मुख्यमंत्री धान खरीदी केंद्र देखे आए रहिन अऊ ये बेरा म गांव वाले मन ले अपील करे रहिन, उहां गांव वाले मन बड़ संख्या म आज पैरादान बर आगू आइन। सरपंच श्रीमती पुष्पा चंद्राकर ह बताइस कि पैरा सकेले म सुविधा होवय, एखर बर जिला प्रशासन कोति ले बेलर दे गए रहिस। बेलर बहुत तेजी ले चारा के गट्ठा बना लेथे। उमन बताइस कि अभी किसान राकेश चंद्राकर के खेत म बेलर हे। उमन करीबन सात एकड़ के पैरादान करे हें। उमन बताइस कि बेलर भिनसरहा ले आए हे अऊ अब तक 34 गट्ठा बना उरे हे। एक गट्ठा म करीबन 25 किलोग्राम पैरा होथे। अब ए मन ल गौठान तक छोड़े जाही। बेलर के सेती काम सरल हो जात हे।
अइसे लेवत हे संकल्प– पंचायत के बैठक मन म ग्रामीण पैरादान के संकल्प करत हें। संकल्प के सबद ये प्रकार हे। मैं आंव उत्कृष्ट किसान, मैं करिहंव पैरा दान, बाढ़ही गौमाता के मान। अपन गौठान मन के विकास बर ग्रामीण खुदे आगू आवत हें। रथ मन के माध्यम ले घलोक मनखे मन ले अपील करे जात हे अऊ मुनादी घलोक करे जात हे।