रायपुर, 16 दिसम्बर 2020। महिला अऊ बाल विकास विभाग कोति ले प्रदेश के 27 जिला मन म संचालित सखी वन स्टॉप सेंटर म पाछु 2 साल म 6 हजार 696 प्रकरण मन के निराकरण करे गए हे अऊ 3 हजार 694 प्रकरण मन म महिला मन ल आसरा दे गए हे। जानबा हे के प्रदेश म पीड़ित अऊ संकटग्रस्त महिला मन ल एके छत के नीचे जरूरी सुविधा अऊ सहायता उपलब्ध कराए के उद्देश्य ले सखी सेंटर के संचालन करे जात हे। अब ये केन्द्र महिला मन ल एक छत के नीचे तुरंत सहायता दे के एक सशक्त अऊ सुलभ माध्यम बनत जात हे।
ये बारे म बतावत महिला अऊ बाल विकास मंत्री श्रीमती अनिला भेंड़िया ह कहिन के राज्य सरकार हर महिला के सुख-दुख म सहभागी हे अऊ हर संभव सहायता बर तत्पर हे। कई अइसे मामला हे जेमा सखी सेंटर के माध्यम ले काउंसलिंग कर के पति-पत्नि के बीच समझौता कराके उंखर गृहस्ती ल फेर बसाए म मदद करे गए हे। समझौता नइ होए के स्थिति म आवेदिका मन ल उंखर स्त्री धन लहुटाए गए हे। महिला मन ल पुलिस, विधिक अऊ मेडिकल सुविधा उपलब्ध कराए गए हे। दूसर प्रदेश म भटके महिला मन ल वापस लाए गए हे। लड़ई-झगरा के चलते घर ले रात म निकाल देहे के स्थिति म महिला मन ल सुरक्षित आसरा दे गए हे। निराश्रित अऊ बीमार बुजुर्ग महिला मन के उपचार कराके सुरक्षित स्थान मन म भेजे गए हे। ए सेंटर मन म सबो वर्ग, धर्म, संप्रदाय के महिला मन ल एके छत के नीचे उंखर जरूरत के अनुसार चिकित्सा, विधिक सहायता, मनोवैज्ञानिक सलाह, पुलिस सहायता, अस्थायी आश्रय, मानसिक चिकित्सा अऊ परामर्श के सुविधा देहे जाथे।
दू साल म सखी वन स्टॉप सेंटर म होइस 6 हजार 694 प्रकरण मन के निराकरण : सेंटर म 3 हजार 694 महिला मन ल मिलीस आसरा
