गरियाबंद, 05 अक्टूबर 2020। छुरा थाना के अपराध क्र. 136/2020 के मुताबिक वन्य प्राणी संरक्षण अधिनियम, 1972 के धारा 9, 34, 39(2), 52 के तहत् एक जिन्दा साल खपरी संग 3 आरोपी ल पकड़े गए हे अऊ साल-खपरी ल वन विभाग ल संउप देहे गए हे।
जानबा हे के एसपी भोजराम पटेल ल मुखबिर ले सूचना मिले रहिस के 3 मनखे कोठीगांव थाना छूरा कोति बोरी म साल-खपरी धर के जावत हें। एसपी ह थाना छूरा के थानेदार राजेश जगत ल कारवाही करे बर हुकुम दीस। थानेदार ह उड़ीसा कोति जाए वाले रोड म नाकाबंदी करिस त सेठ जामपानी थाना धरमबांधा, जिला नुआपाड़ा उड़ीसा के रहवईया भोज सिंह भुंजिया, संतोष भुंजिया अऊ नंदकुमार भुंजिया ल पकडि़स अऊ उंखर तीर बोरा म लुकाए एक जिंदा साल-खपरी पाईस।
