रइपुर, 9 मई 2021 इतवार। छत्तीसगढ़ शासन कोति ले प्रदेश म कोविड-19 के संक्रमण के नियंत्रण बर सामाजिक, धार्मिक अउ आने आयोजन मन के संबंध म सबो संभागायुक्त, पुलिस महानिरीक्षक, कलेक्टर अउ पुलिस अधीक्षक मन ल विस्तृत दिशा-निर्देश आज जारी करे गे हवय। सामान्य प्रशासन विभाग कोेति ले ये संबंध म जारी निर्देश म कहे गे हवय कि कोरोना वायरस के नवा वेरियन्ट के संक्रमण म नियंत्रण के परिप्रेक्ष्य म कोविड-19 संक्रमण नियंत्रण खातिर शादी बिहाव अउ अन्त्येष्टि म 10 मनखे ले जादा झन के संघरे म प्रतिबंध रहिही। आने सबो प्रकार के धार्मिक, सामाजिक, राजनैतिक अउ आने आयोजन कटाकट बंद रहिही।
धार्मिक अउ सामाजिक तिहार मन के संबंध म धार्मिक गुरू, प्रमुख मन ले अपील करे जाए कि वोमन लोगन ल धार्मिक— सामाजिक तिहार मन म भीड़भाड़ झन करैं, पूजा अउ आने आयोजन अपन-अपन घर म व्यक्तिगत रूप ले करे बर प्रोत्साहित करैं। कोरोना पॉजिटिव मनखे मन ले आईसोलेशन प्रोटोकॉल के पालन के बेरा -बेरा म जांच करे जाय। उन्कर मन ले सार्वजनिक भीड़भाड़ वाले सुविधा, तरिया के उपयोग झन करे जाय, ताकि संक्रमण आगू झन बगरैं।
