रइपुर, 24 जुलाई 2021 शनिच्चर। प्रदेश म चार महीना बाद आंगनबाड़ी केन्द्र सम्मार 26 जुलाई ले फेर खुलही। एकर पहिली कोविड-19 के सेति 22 मार्च ले आंगनबाड़ी केन्द्र मन के संचालन बंद रखत हितग्राही मन ल घर पहुंचाके सूखा राशन देहे जावत रिहिन हे। पीछू 20 जुलाई के होए मंत्रिपरिषद के बइठका म आंगनबाड़ी केंद्र मन ल दू पारी म संचालित करे के निर्णय लेहे गे हवय । कंटेनमेंट जोन या जिला प्रशासन कोति ले बंद करे के निर्णय लेहे गे क्षेत्र मन म आंगनबाड़ी संचालित नई होवयं।
विश्व स्वास्थ्य संगठन अउ यूनिसेफ जइसन अंतर्राष्ट्रीय संस्था मन के मानना हे कि कोविड-19 के सेति कुपोषण म बढ़ोत्तरी हो सकत हे, एकर सेति कुपोषण ल थाम्हे बर कारगर कदम उठाए के आवश्यकता हवय। येला धियान म रखत आंगनबाड़ी केन्द्र मन म लइका मन ल मंझनिया के ताते—तात जेवन अउ स्वास्थ्य अउ पोषण दिवस ल कोविड-19 के प्रोटोकॉल के पालन करत प्रारंभ करे के निर्देश देहे गे हवय। ये बेरा म 3 ले 6 बछर तक के लइका, गर्भवती माइलोगन अउ सुपोषण अभियान के हितग्राही मन ल आंगनबाड़ी आए के अनुमति होही। केन्द्र म लइका मन ल भेजे बर पालक मन के सहमति लेहे के निर्देश तको देहे गे हे । केन्द्र म हितग्राही मन ल अलग-अलग समूह म अलग अलग समे म बलाय जाही। एक समे म 15 मनखे ले जादा लोगन भवन म झन होवय।
