प्रदेश के सबो सामुदायिक स्वास्थ्य केंद्र मन म स्थापित होही ब्लड-बैंक: श्री टी.एस. सिंहदेव स्वास्थ्य मंत्री ह रक्तदान महिना के करिस शुभारंभ

मनखे मन ल रक्तदान बर प्रेरित करे राष्ट्रीय स्वैच्छिक रक्तदान दिवस म प्रचार-प्रसार रथ ल हरियर झंडा देखाके करिस रवाना
रायपुर, स्वास्थ्य मंत्री श्री टी.एस. सिंहदेव ह आज राष्ट्रीय स्वैच्छिक रक्तदान दिवस के अवसर म रक्तदान महिना के शुभारंभ करिन। उमन मनखे मन ल रक्तदान बर प्रेरित करे बर सिविल लाइन स्थित अपन निवास कार्यालय ले प्रचार-प्रसार रथ ल हरियर झंडी देखाके रवाना करिस। ये प्रचार रथ रायपुर, बिलासपुर, दुर्ग अउर भिलाई के प्रमुख हाट-बाजार, मॉल्स, स्कूल अउ कॉलेज मन म स्वैच्छिक रक्तदान बर नागरिक मन ल जागरूक करही। जानबा हे कि रक्तदान ल बढ़ावा देहे बर हर साल 1 अकटूबर के राष्ट्रीय स्वैच्छिक रक्तदान दिवस मनाए जाथे। ये साल एला “Give blood and keep the world beating” थीम उपर मनाए जात हे।
स्वास्थ्य मंत्री श्री सिंहदेव ह रक्तदान महिना के शुभारंभ करत कहिन कि सबो जिला मन के मुख्य चिकित्सा अउ स्वास्थ्य अधिकारी मन ल अकटूबर महिना ल रक्तदान महिना के रूप म मनाए अऊ ये महीना जादा ले जादा रक्तदान शिविर आयोजित करे बर निर्देशित करिन। स्वास्थ्य विभाग प्रदेश के सबो सामुदायिक स्वास्थ्य केंद्र मन म ब्लड-बैंक स्थापित करे के दिशा म काम करत हे। उमन बताइन कि राज्य गठन के समय छत्तीसगढ़ म केवल नौ ब्लड-बैंक रहिस जेन अब बढ़के 95 हो गे हे। प्रदेश के 28 जिला मन म 31 शासकीय ब्लड-बैंक संचालित हे। नवगठित गौरेला-पेंड्रा-मरवाही जिला म घलोक ये साल शासकीय ब्लड-बैंक शुरू हो जाही।
श्री सिंहदेव ह कहिन कि राज्य के आबादी के मुताबिक हर साल इहां दू लाख 55 हजार यूनिट रक्त के जरूरत होथे। एखर विरूद्ध करीब दू लाख यूनिट के प्रतिपूर्ति होवत हे। ब्लड-बैंक मन म रक्त के संकलन हर साल बढ़ाए जात रहा हे। रक्तदान महिना के शुभारंभ कार्यक्रम म संचालक स्वास्थ्य सेवाएं-सह-परियोजना संचालक श्री नीरज बंसोड़, अकतहा परियोजना संचालक डॉ. एस.के. बिंझवार अऊ आईईसी के संयुक्त संचालक श्री अजय कुमार सिंह संग छत्तीसगढ़ राज्य एड्स नियंत्रण समिति के बहुत अकन पदाधिकारी मौजूद रहिन।