रइपुर, 8 जून 2021 मंगल। महिला अउ बाल विकास मंत्री श्रीमती अनिला भेंड़िया ल उन्कर राजधानी के घरू कार्यालय म गोल्डन बुक के अधिकृत प्रतिनिधि श्रीमती सोनल राजेश शर्मा ह छत्तीसगढ़ म एके संघरा 3 हजार 229 जोड़ा मन के सामूहिक विवाह समारोह ल ‘गोल्डन बुक ऑफ वर्ल्ड रिकार्ड’ म संघारे गेहे के प्रमाण पत्र सौंपीन। ये बेरा म छत्तीसगढ़ राज्य महिला आयोग के अध्यक्ष श्रीमती किरणमयी नायक तको संघरे रिहिन।
उल्लेखनीय हवय कि मुख्यमंत्री दाउ भूपेश बघेल के रहिती म बीते 27 फरवरी के छत्तीसगढ़ म पहिली पइत 22 जिला म एके संघरा मुख्यमंत्री कन्या बिहाव योजना के अंतर्गत सामूहिक विवाह समारोह के आयोजन करे रिहिन हे। सबो जिला ल राजधानी रइपुर म होवइया समारोह ले वीडियो कॉन्फ्रेसिंग के माध्यम ले जोड़ेे गे रिहिसे। राजधानी रइपुर के बलबीर सिंह जुनेजा इंडोर स्टेडियम परिसर म होवइया समारोह म मुख्यमंत्री दाउ बघेल संंघर के अबड़ अकन जिला केे नवा—नेवरिया जोड़ा मन ले गोठबात करके उन मन ल आशीर्वाद देहे रिहिने।
महिला अउ बाल विकास मंत्री श्रीमती भेंड़िया ह ये बेरा म कहीन कि मंहगई के बेरा म कमती खर्चा म बिहाव बर सामूहिक कन्या बिहाव एक ठो बने योजना हेे। प्रदेश सरकार ह येे योजना के तहत 10 हजार रूपिया के बढ़ोतरी करके 25 हजार रूपिया के प्रावधान करे हवय, अइसनेहे दिव्यांग जोड़ा मन बर बिहाव के प्रोत्साहन राशि तको 50 हजार रूपिया लेे बढ़ाके एक लाख रूपिया कर दे हवय। ये योजना के फायदा जादा ले जादा परिवार मन तक पहुुुच सकै एकर बर राज्य सरकार सरलग प्रयास करत हावय।
