आबकारी विभाग म करोड़ों के घोटाला, ईओडब्ल्यू के छापा

धमेन्‍द्र निर्मल के सार समाचार, रायपुर। आबकारी विभाग म करोड़ों के घोटाला के शिकायत मिले हे तेन अधार म ईओडब्ल्यू के टीम ह अधिकारी समुन्द्र सिंह के ठिहा म छापा मारिस।
ईडब्ल्यूओ टीम ह बड़े बिहिनिया बोरियाकला स्थित मकान नंबर 172 म छापा मारिस। तेकर पीछू कागज पत्तर के जांच करके जब्ती के कार्यवाही करिस। अइसे जानबा होए हवय कि मकान नागपुर में पदस्थ एक विजलेंस अधिकारी के आय जिहां समुन्द्र सिंह ह सरलग आवत जावत राहय। मकान म ईओडब्ल्यू के टीम ह कागज पत्तर के जांच करे के पीछू जब्ती के कार्यवाही करत हावय। ईओडब्ल्यू अउ शासन ल फरार समुन्द्र सिंह के तलाश हे जउन ह सरकार बदलते साथ अपन
इस्तीफा देके फरार हो गे हवय।

कांग्रेस नेता नितिन भंसाली ह ईओडब्ल्यू म अधिकारी समुन्द्र सिंह के विरूध्द शिकायत करे रिहिन हे। नितिन भंसाली ह अपन शिकायत म कहे रिहिन हे कि समुद्र सिंह ह आबकारी विभाग म 9 बछर तक संविदा म रहिते राहत करोड़ों के घोटाला करे रिहिस हे। नितिन भंसाली ह बताइस कि 22 फरवरी 2019 के बीजेपी शासनकाल म वो ह संविदा म 9 बछर तक आबकारी विभाग म विशेष कर्तव्यस्थ अधिकारी के पद म पदस्थ रिहिसे। जेमा लिकर पोलिसी, शराब बिक्री, प्रॉफिट मार्जिन, निम्न श्रेणी के शराब ल आईएमएल के श्रेणी म रखत शराब ठेकेदार अउ निर्माता मन ल लाभ पहुंचाए हे अउ संगे संग कर लगभग 5 हजार करोड़ रूपिया के घोटाला करे हावय। ये संबंध म भंसाली ह ईओडब्ल्यू ल घोटाला के 119 पेज के कागज पत्तर के संगे संग मुख्यमंत्री अउ ईओडब्ल्यू ले शिकायत करे रिहिन हे।

चटकारा
टेटकू:- चाँदी तो साहबे मन काटथे बोचकू , गाड़ी के बाती घलो लाल अउ मुँह कान घलो लाले-लाल।
बेचकू:- हहो ! फेर मुँह करियाथे त अइसे करियाथे के एकदम अछप हो जथे खोजे छइहां नइ दिखय।
टेटकू :- बड़े आदमी के बड़े गोठ बोचकू। ए थोरे तै के मैं। हमार बर तो ठौं ठौं म नियम ठौं ठौं कानून।
बेचकू:- भइगे ! चोरे-चोर के रखवारी म, एक पाँव तिजौरी त एक पाँव दुवारी म।