कोरिया, जिला प्रशासन कोति ले ग्रामीण क्षेत्र के महिला मन ल आत्मनिर्भर अऊ आर्थिक रूप ले सशक्त बनाए के दिशा म संगम अभियान के तहत सरलग प्रभावशाली प्रयास करे जात हे। इही कड़ी म विकासखंड सोनहत के ग्राम पंचायत तंजरा म मनरेगा श्रमिक परिवार के महिला मन ल पशुपालन म एक दिवसीय विशेष प्रशिक्षण प्रदान करे गीस, जेमा 35 महिला हितग्राही मन ह सक्रिय भागीदारी करिन। ए प्रशिक्षण विशेष रूप ले ओ महिला मन बर आयोजित करे गए रहिस, जेमन ल महात्मा गांधी नरेगा योजना के तहत बकरी शेड, मुर्गी शेड, सुकर पालन शेड जइसे पशुपालन इकाई प्रदान करे गए रहिस।
कार्यक्रम के उद्देश्य ए महिला मन ल प्रशिक्षित करके अपन पशुधन संसाधन के वैज्ञानिक अउ व्यावसायिक उपयोग ल सिखाना रहिस, ताकि ओमन ए गतिविधि ले स्थायी आय अर्जित कर सकंय। बताए रद्दा अउ तकनीकी प्रशिक्षण म पशु चिकित्सा अधिकारी डॉ. रामस्वरूप चंदे ह बकरी पालन, मुर्गी पालन अऊ सुगर पालन के आधुनिक वैज्ञानिक विधि, रोग प्रबंधन, पोषण, टीकाकरण, अऊ स्वच्छता ले संबंधित महत्वपूर्ण जानकारी दीन। महिला मन ह पशुपालन ले संबंधित अपन जिज्ञासा ल खुलके रखिन, जेखर समाधान विशेषज्ञ कोति ले करे गीस।
ए बेरा म ग्राम पंचायत के सरपंच, सचिव, मनरेगा कार्यक्रम अधिकारी अऊ बिहान टीम के सदस्य उपस्थित रहिन। प्रशिक्षण के दौरान प्रतिभागी मन म उत्साह अऊ सीखे के ललक साफ-साफ दिखिस।
50 परिवार मन ल मिलिस पशुपालन शेड के लाभ
ग्राम पंचायत तंजरा म अब तक 50 मनरेगा श्रमिक परिवार मन ल पशुपालन से संबंधित शेड पास हो गए हे एमन ल बिहान समूह मन ले जोड़के लखपति दीदी अभियान के तहत आय वर्धक गतिविधि ले सशक्त करे जावत हे। ये पहल ग्रामीण महिला मन ल गरीबी रेखा ले ऊपर उठाय के दिशा म एक व्यवस्थित अउ प्रभावशाली प्रयास हे।
प्रशासन के प्रतिबद्धता: हर महिला बने लखपति दीदी
जिला पंचायत कोरिया के मुख्य कार्यकारी अधिकारी डॉ. आशुतोष चतुर्वेदी ह बताइस के ये प्रशिक्षण कलेक्टर श्रीमती चंदन त्रिपाठी के बताए रद्दा म ‘संगम अभियान’ के तहत शुरू करे गए हे। उमन कहिन के हमर उद्देश्य सिरिफ प्रशिक्षण देना भर नइ हे, बल्कि महिला मन ल आय आधारित गतिविधि मन ले जोड़के ओमन ल आर्थिक रूप ले आत्मनिर्भर बनाना हे। संगम अभियान एक अइसन मंच हे जेन महिला मन ल ‘लखपति दीदी’ बने के दिशा म अग्रसर करत हे। श्री चतुर्वेदी ह कहिन के ए पहल न केवल महिला मन के जीवन ल बदलही बल्कि ग्रामीण अर्थ व्यवस्था ल घलो गति प्रदान करही।
संगम अभियान महिला मन ल आर्थिक रूप ले बनात हे सशक्त
