राजनांदगांव एसपी के पत्नी संगीता शुक्ला गरीब-बेसहारा मन बर बनावत हे जेवन
महासमुंद, 3 अप्रैल 2020। न्यू इंडिया टाईम्स के संवाददाता डीपी गोस्वामी के बताती छत्तीसगढ़ म लॉकडाउन ल सफल बनाए बर अऊ गरीब, असहाय मन ल जेवन कराए बर अपन-अपन कोति ले रकम-रकम के उपाय करे जात हे। अइसनहे राजनांदगांव के एसपी जितेंद्र शुक्ला के पत्नी संगीता शुक्ला ह अपन घर म रोजेच स्वयं सेवक मन के संग मिलके जरूरतमंद मन बर खाना बनाए के काम शुरू करे हें। उमन खुदे सोंहारी तरत हें अउ साग तको बनावत हें। वेब पोर्टल म छपे फोटू म उमन खुदे भजिया कड़ही बनावत दिखत हें। तियार जेवन के पेकेट बनाके बस्ती मन म उमन खुदे जाथें अऊ बांटथें।
संगीता शुक्ला ह बताइस हे के खाना के पैकेट म सोंहारी, साग, चांउर अऊ दार देहे जात हे। गरीब मन तक पहुंचाए बर बकायदा एक सूची तियार करे गए हे। ये सूची के आधार म भिनसरहा ले ही तियारी शुरू हो जाथे। संगीता अभी महासमुंद म हे अऊ ऊंखर पति राजनांदगांव म हे। वो भिनसरहा 8:00 बजे ले तैयारी म जुट जाथें। करीबन 11:00 ले 12:00 बजे तक 40 ले 50 मनखे मन के खाना तियार हो जाथे। परिवार के सदस्य मन के संग मिलके ओला बांटे बर निकलथें। खाना बांटे के बेरा म उमन अपन संग सैनिटाइजर अऊ हैंडवाश लेके जाथें। मजदूर मन के हाथ धोवाए के पाछू उनला जेवन देहे जात हे। खाए के संग पानी के छोटे बोतल घलोक देहे जात हे। जेखर से मजदूर मन के स्वास्थ्य घलोक बेहतर होवत हे।
चार साल के बेटा ह दीस बचाव के संदेश:- संगीता अपन घर म दू लइका मन ल संभाले के जिम्मेदारी घलोक निभावत हे। संगीता ह मनखे मन ल जागरूक करे बर सोशल मीडिया के भरपूर उपयोग करत हे। वो ह अपन 4 साल के बेटा विशु के एक वीडियो तियार करे हे। ये मां विशू ह सैनिटाइज रहे के बारे म सवाल करत हे। विशु बताथे के हाथ ल हैंडवॉश करना हे। सैनिटाइजर के उपयोग करना हे। अऊ मनखे मन ले उचित दूरी बनाए रखना हे। आप मन ल बता देवन के श्रीमती शुक्ला के दिल म शुरू ले ही मानवता कूट-कूट के भरे हे, जेखर चलत हर वर्ग उंखर नाम बड़ गर्व ले लेथे, महिला मन के बीच घलोक उंखर एक अलग पहिचान बने हे, प्रदेश म नारी शक्ति के रूप म ओ मन एक मिशाल कायम करे हें।
