ग्रामीण महिला मन के आत्मनिर्भरता के दिशा म सराहनीय कदम, सक्ती प्रशासन के सतत सहयोग
सक्ती, देवारी जइसे प्रमुख तिहार के अवसर म छत्तीसगढ़ राज्य ग्रामीण आजीविका मिशन (बिहान) के तहत कार्यरत जिला सक्ती के महिला मन ह आत्मनिर्भरता के दिशा म एक नवा मिसाल पेश करे हे। ग्राम पलाड़ीखुर्द के राधा कृष्ण स्व-सहायता समूह के सदस्या मन अपन “संगिनी” ब्रांड के अंतर्गत आकर्षक गिफ्ट हैम्पर तैयार करत हें, जेमें कई प्रकार के सुगंधित अऊ डिज़ाइनर मोम उत्पाद सामिल हे।
महिला मन के सशक्तिकरण अऊ रोज़गार सृजन के दिशा म महत्वपूर्ण पहल
यह अभिनव पहल महिला मन के आर्थिक सशक्तिकरण अऊ रोज़गार सृजन के दिशा म महत्वपूर्ण योगदान देव हे। जिला प्रशासन सक्ती कोति ले दीदी मन ल उत्पाद निर्माण, पैकेजिंग अऊ विपणन खातिर सरलग सहयोग अऊ मार्गदर्शन देहे जात हे। समूह के सदस्य श्रीमती पुष्पा दीदी ह बताइस के समूह कोति ले हिहारी सीजन ल ध्यान म रखत राखी, रंगोली, आचार, गुलाल, अऊ मोम उत्पाद जइसे रंग-रंग के जिनिस के निर्माण करत हें। उमन कहिन के ए गतिविधि मनले हलन ल न केवल आर्थिक लाभ मिले हे बल्कि आत्मविश्वास घलोक बाढ़े हे।
समूह ल 2 लाख रूपिया तक के आय
पुष्पा दीदी ह आगू बताइस के समूह के दीदी मन ह पहिली आर-सेटी ले डिज़ाइनर कैंडल बनाए के प्रशिक्षण प्राप्त करे रहिन। एखर बाद यूट्यूब वीडियो के माध्यम ले गिफ्ट हैम्पर तैयार करे के विचार आइस। ए समय जिला के कई ठन इंडस्ट्रीज अऊ संस्थान मन ले गिफ्ट हैम्पर के ऑर्डर प्राप्त होए हे, जेकर आपूर्ति दीदी मन समय म अऊ आकर्षक पैकेजिंग म करत हें। ए पहल ले समूह ल लगभग 1 लाख 50 हजार ले 2 लाख रूपिया तक के व्यवसाय प्राप्त होए के संभावना हे। ए मन ल अभी तक लगभग 60 हज़ार रुपिया के गिफ्ट हैंपर के ऑर्डर मिल गे हे । ये प्रयास ग्रामीण महिला मन ल आत्मनिर्भर बनात ओ मन ल स्थायी आजीविका अऊ उद्यमिता के नवा अवसर देवत हे। बिहान मिशन के तहत संचालित ये पहल महिला मन के सृजनशीलता, मेहनत अऊ नवाचार के उत्कृष्ट मिसाल हे, जेन आन समूह मन खातिर घलोक प्रेरणा के स्रोत बनही।