पशुपालन व्यवसाय ले आर्थिक रूप ले मजबूत होइस संजय

जांजगीर-चांपा, 13 दिसंबर 2020। जिला के विकास खंड नवागढ़ के ग्राम धुरकोट निवासी 32 वर्षीय युवा किसान संजय राठौर ह अपन परिश्रम अऊ लगन के संग सरकार के डेयरी उद्यमिता विकास योजना के बदौलत आर्थिक रूप ले मजबूत होय हे। उमन एक सफल व्यवसायी के रूप म अपन पहिचान बनाए हे।  डेयरी ले प्रतिदिन 150 लीटर दूध उत्पादन होथे। जेखर ले महिना म 35 हजार रुपिया ले जादा के आमदनी होवत हे। एखर अलावा करीब 60 किलो गोबर प्रतिदिन मिलथे, जेखर ले वो खेती बर खाद स्वयं तैयार करत हे।

पशुधन विकास विभाग ले मिले जानकारी के अनुसार संजय ह आधुनिक खेती अऊ पशुपालन के नवा तरीका ल अपनाए हे।  दूध व्यवसाय बर उच्च नस्ल के 20 गाय अऊ 20 छोटे मवेशी हे। मवेशी मन के अनुमानित लागत करीब 13 लाख रूपिया ले अधिक हे। एखर अलावा 10 एकड़ खेत म कृषि घलो करत हे। डेयरी उद्यमिता विकास योजना के तहत संजय ह दूध उत्पादन के व्यवसाय बछर 2017 म करीब 12 लाख रूपिया के लागत ले शुरू करिन। जेमां सरकार द्वारा 06 लाख रूपिया के अनुदान प्राप्त होइस। शुरूआत म 10 उन्नत नस्ल के गाएं रिहिस।  पशुधन विकास विभाग के योजना के तहत कृत्रिम गर्भाधान अऊ टीकाकरण नियमित रूप ले करे गिस। संजय ह कहिन कि पशुपालन अऊ कृषि दुनो एक दूसर के पूरक हे। गोबर खाद मिले ले धान उत्पादन म वृद्धि होय हे। उमन राज्य सरकार के सुराजी गांव योजना नरवा, गरवा, घुरवा अऊ बारी योजना ल किसान हितैषी बतइस अऊ ओखर तारीफ करिन ।