कोरबा,1 जनवरी 2021। छत्तीसगढ़ म ग्रामीण मन बर हाट बाजार क्लीनिक संजीवनी साबित होय हे। गांव म स्वस्थ्य सुविधा ल उपलब्ध कराये बर हाट बाजार क्लीनिक बाजार के दिन लगाए जावत हे। हाट बाजार म मेडिकल टीम पहुंच के जरूरतमंद लोगन के इलाज करत हे। मरीज मन के जरूरी जांच करके ओमन ल आवश्यक दवा देहे जावत हे अऊ आवश्यकतानुसार चिकित्सीय परामर्श देहे जावत हे।
कोरबा जिला के तरदा गांव के हाट बाजार म नजदीक के गांव ले 12 बछर के दर्शन अपन बबा के संग अपन गांव के नजदीक साप्ताहिक बाजार करे बर ग्राम तरदा पहुंचे रहिस। अपन बबा के संग बालक दर्शन हंसी-खुशी ले सामान के खरीददारी करत रहिस। संझा साढ़े चार बजे बालक दर्शन ल अचानक चक्कर आइस। चक्कर आये के सेती दर्शन लड़खड़ात हुए गिर पड़िस। दर्शन ल गिरत देख दर्शन के बबा तत्काल बालक ल अपन गोद म उठा के बाजार म संचालित होवत मुख्यमंत्री हाट बाजार क्लीनिक के तरफ भागिस। हाट बाजार क्लीनिक म मौजूद ग्रामीण चिकित्सा सहायक डॉक्टर पूर्णानंद सोनी अऊ नर्स ह बच्चा के हालत ल देख के तत्काल पास के रखे टेबल म लेटाइस। डॉक्टर ह तुरंत बालक दर्शन के आंख, मुंह, नाड़ी के जांच करिन। डॉक्टर के जांच करे के दौरान ही नर्स ह ओ. आर. एस. घोल तैयार करके ले आइस। बालक ल तुरंत ही शरीर म पानी के कमी दूर करे ओ. आर. एस. घोल पिलाये गीस। ओ. आर. एस. घोल पीयत ही बालक के शरीर म ताकत आइस अऊ वो अपन बल म बइठ गए।
इलाज के दौरान डॉक्टर ह पाइस कि दर्शन के शरीर म खून के बहुत कमी हे। डॉक्टर ह खून के भारी कमी के सेती दर्शन ल चक्कर आये के बात कहिन। डॉ. ह दर्शन ल एनीमिया ग्रस्त होय के सेती फोलिक एसिड के गोली घलो दीन। डॉक्टर ह दर्शन के बबा ल ओ. आर. एस. के पैकेट दीन अऊ नियमित अंतराल म दर्शन ल पिलाये के सलाह घलो दीन। बालक ल अपन बल म बइठ देख वोखर बबा के चेहरा म संतुष्टि अऊ मुस्कान आइस अऊ ओमन इलाज बर डॉक्टर अऊ नर्स के हृदय ले आभार जताइस। दर्शन के बबा ह मुख्यमंत्री हाट बाजार क्लीनिक संचालित करे बर शासन के धन्यवाद घलो करिन।
