विकसित गांव ले ही विकसित भारत बने के सपना होवत हे पूरा – विधायक श्री सिन्हा
महासमुंद के ग्राम चिंगरौद, बम्हनी, बरोंडा अऊ नांदगांव म पहुंचिस विकसित भारत संकल्प यात्रा
महासमुंद, 02 जनवरी 2024। प्रधानमंत्री श्री नरेन्द्र मोदी के महत्वाकांक्षी विकसित भारत संकल्प यात्रा के पड़ाव आज महासमुंद विकासखण्ड के ग्राम चिंगरौद, बम्हनी, बरोंडाबाजार अऊ नांदगांव पहुंचिस अउ इहां शिविर लगाके योजना मन के जानकारी अऊ लाभ देहे गीस। ग्राम पंचायत बरोंडाबाजार म महासमुंद लोकसभा सांसद श्री चुन्नीलाल साहू बतौर मुख्य अतिथि एमा सामिल होइन। उमन कहिन कि विकसित भारत संकल्प यात्रा वंचित अऊ आखरी छोर के मनखे मन ल शासन के प्रमुख योजना मन ले जागरूक करके ओ मन ल लाभान्वित करत हे। उमन कहिन कि मोदी सरकार के गारंटी वाले गाड़ी ले भारत सरकार कोति ले संचालित कई ठन योजना मन अऊ कार्यक्रम मन के जानकारी डिजिटल स्क्रीन, फ्लेक्स अऊ पोस्टर के माध्यम ले जन-जन तक पहुंचाए जात हे। उमन सबो गांव वाले मन ल केन्द्र सरकार के योजना मन के लाभ उठाए के बात कहिन। उमन कहिन कि गांव वाले मन म अइसन मनखे जेन शासन के योजना ले अब तक वंचित रह गये रहिन ओ मन ल लाभान्वित करे के दिशा म काम करे जात हे। उमन शिविर म छः महिना के लइका मन ल खीर खवाके अन्नप्रासन्न कराइन अऊ हितग्राही मन ल प्रमाण पत्र घलोक वितरण करिन। उमन अपील करिन कि सबो योजना मन के लाभ पात्रतानुसार अवश्य उठावयं।
इही कड़ी म आज महासमुंद विकासखण्ड के ग्राम चिंगरौद म महासमुंद विधायक श्री योगेश्वर राजू सिन्हा ह स्थानीय जनप्रतिनिधि अउ अधिकारी मन के संग मिलके विकसित भारत संकल्प यात्रा के माध्यम ले ग्राम वासी मन ल जनकल्याणकारी योजना मन के बारे म अवगत कराइन। विधायक श्री सिन्हा ह कहिन कि ये प्रधानमंत्री श्री नरेंद्र मोदी के गारंटी गाड़ी ये। विकसित अऊ आत्मनिर्भर भारत के निर्माण बर प्रदेश के जन जन तक ये गाड़ी पहुंचके ओ मन ल विकास के दौड़ म भागीदार बनाही अऊ सरकार के योजना मन के लाभ उन तक पहुंचाही। उमन कहिन कि मोदी जी के सपना हे कि हर गरीब के उन्नति अऊ प्रगति होवय ओखर खातिर काम होवत हे।
उमन कहिन कि सबो योजना मन के लाभ पात्रतानुसार अवश्य उठावयं। कार्यक्रम म श्री सिन्हा ह विभागीय योजना स्टॉल के अवलोकन करिन। ये बेरा म उमन स्टॉल प्रभारी अऊ हितग्राही मन ले चर्चा करके योजना के लाभ देहे के निर्देश दीन। उमन महिला बाल विकास विभाग के स्टाल म छै महिना के लइका मन ल खीर खवा के अन्नप्राशन कराइन। कार्यक्रम म श्री पवन पटेल, श्री संदीप दीवान, श्री मुन्ना साहू, जनपद सीईओ श्रीमती मिषा कोसले संग सरपंच, स्थानीय जनप्रतिनिधि, अधिकारी-कर्मचारी अऊ बड़ी संख्या म हितग्राही मौजूद रहिन।
शिविर म आए गांव वाले मन ल प्रधानमंत्री आवास, उज्ज्वला योजना, जल जीवन मिशन, आयुष्मान स्वास्थ्य कार्ड, वन नेशन वन कार्ड, प्रधानमंत्री विश्वकर्मा योजना, आधार अपडेशन, सस्ती व अच्छा जेनेरिक दवाई आदि के जानकारी देहे के संग योजना मन ले वंचित हितग्राही मन ले आवेदन लेहे गीस। इहां उंखर समस्या मन के घलोक समाधान करे गीस। शिविर स्थल म स्वास्थ्य विभाग कोति ले लगाए गे कैम्प म बीपी, शुगर के जांच अऊ दवइ घलोक देहे गीस। जानबा हे कि जिला के चिन्हित ग्राम पंचायत अउ नगरीय निकाय क्षेत्र मन म विकसित भारत संकल्प यात्रा के आयोजन करे जात हे। शिविर म केंद्र सरकार के कई ठन योजना मन ले हितग्राही मन ल लाभ पहुंचाए अउ जानकारी दे बर विभाग मन कोति ले स्टॉल लगाए जात हे। जिहां पात्र हितग्राही मन ल योजना मन के लाभ देहे गीस अउ जरूरतमंद मनखे मन ले आवेदन फार्म भरवाए गीस।