- दू लाख मनखे मन ल यातायात के दबाव ले मिलही मुक्ति: श्री भूपेश बघेल
- रेल्वे ओव्हर ब्रिज के तरी नाली निर्माण अऊ अशोका रतन कॉलोनी के पीछू पक्का नाला निर्माण के घोषणा
रायपुर, मुख्यमंत्री श्री भूपेश बघेल ह आज संझा रायपुर के शंकर नगर रेल्वे ओव्हर ब्रिज के लोकार्पण करिन। शंकर नगर ले वी.आई.पी. कॉलोनी मार्ग के रायपुर-विशाखापटनम् रेल्वे लाईन म करीबन 68 करोड़ रूपिया के लागत ले ए ब्रिज के निर्माण करे गए हे।
कार्यक्रम ल सम्बोधित करत मुख्यमंत्री श्री भूपेश बघेल ह कहिन कि करीबन 10 बछर के अगोरा के बाद ए रेल ओव्हर ब्रिज के निर्माण के काम पूरा होये हे। एखर से रायपुर शहर के करीबन दू लाख मनखे मन ल सुगम यातायात के सुविधा उपलब्ध हो गए हे। उमन कहिन कि राज्य निर्माण के पहिली व्हीआईपी कॉलोनी शहर के आखरी छोर म गिने जात रहिस, फेर आज के स्थिति म ये रायपुर शहर के हृदय स्थल हो गए हे। ए क्षेत्र म जनसंख्या म बढ़ोतरी के सेती यातायात के अड़बड़ दबाव बाढ़ गए रहिस। उमन रेल्वे ओव्हर ब्रिज के तरी पानी निकासी बर पक्का नाली निर्माण करे अऊ अशोका रत्न के पीछू बोहाने वाला कच्चा नरवा ल पक्का निर्माण करे के घलोक घोषणा करिन।
कार्यक्रम के अध्यक्षता करत लोक निर्माण मंत्री श्री ताम्रध्वज साहू ह कहिन कि ए ब्रिज के निर्माण ले शंकर नगर मार्ग ले बलोदाबाजार मार्ग बर विधानसभा जवइया-अवइया मन बर सुगम मार्ग उपलब्ध हो गए हे। उमन बताइस कि जुन्ना छोटे रेल्वे लाईन के जगा म बने एक्सप्रेस-वे के लोकार्पण घलोक एक महिना के भीतर करे जाही।
कार्यक्रम म कृषि मंत्री श्री रविन्द्र चौबे, वन मंत्री मोहम्मद अकबर, आदिम जाति अउर अनुसूचित जाति विकास मंत्री डॉ. प्रेमसाय सिंह, सांसद श्री दीपक बैज, विधायक सर्वश्री सत्यनारायण शर्मा, बृजमोहन अग्रवाल, कुलदीप सिंह जुनेजा, विकास उपाध्याय अऊ नगर निगम रायपुर के महापौर श्री प्रमोद दुबे विशेष अतिथि के रूप म उपस्थित रहिन।
ए अवसर म लोक निर्माण विभाग के अधिकारी मन ह बताइस कि लगभग 703.03 मीटर लम्बा अऊ 13 मीटर चौड़ा ए ओव्हर ब्रिज शुरू होए ले रेल्वे क्रॉसिंग के दुनों कोति बसे खम्हारडीह, वी.आई.पी कॉलोनी, शंकर नगर, अनुपम नगर, श्री राम नगर, अशोका रतन ले अवइया-जवइया करीबन दू लाख के आबादी लाभान्वित होही। ओव्हर ब्रिज के चालू होए ले लोधीपारा चौक म अक्सर होवइया ट्रैफिक जाम ले घलोक मनखे मन ल राहत मिलही अऊ शंकर नगर ले बलौदाबाजार मार्ग होत विधानसभा जाय बर सुगम मार्ग उपलब्ध होही। रेल्वे ओव्हर ब्रिज के शंकर नगर के तरफ 106 मीटर अऊ व्हीआईपी कॉलोनी के तरफ 135 मीटर लम्बा पहुंच मार्ग बनाये गए हे।
