एक्सपोर्ट ले मुनाफा कमावत हें सांकरा गांव के दीदी मन, 34 लाख रूपिया के गुलाल भेजिन इटली

दुर्ग, ग्रामीण क्षेत्र मन ल शहरी अर्थव्यवस्था ले जोड़े के मुख्यमंत्री श्री भूपेश बघेल के संकल्प न केवल प्रदेश स्तर म सफल होए हे भलुक एकर विस्तार वैश्विक स्तर म पहुंच गए हे। एकर उदाहरण सांकरा के ग्राम संगठन के सदस्य मन तीर हे। इहां के दीदी मन ह 34 लाख रूपिया के गुलाल के कंसाइनमेंट इटली बर एक्सपोर्ट करिन। मुख्यमंत्री श्री भूपेश बघेल ह हरी झंडी देखा के ये कंसाइनमेंट ल रवाना करिन। मुख्यमंत्री ह अच्छा काम बर ग्राम संगठन के महिला मन ल शाबासी दीन। ये कंसाइनमेंट ले करीबन डेढ़ लाख रूपिया के लाभांश स्व सहायता समूह के 58 महिला मन ल मिले हे।
जानबा हे कि ओ मन ल हर दिन 200 रूपिया मानदेय मिलत हे। एखर अलावा ओ मन ल गुलाल के पैकेट तियार करे म प्रति पैकेट 70 पइसा के लाभांश देहे जात हे। काली इटली बर करीबन एक लाख 80 हजार पैकेट गुलाल भेजे गीस। सांकरा म होवत काम मन के संबंध म जानकारी देवत जिला पंचायत सीईओ श्री अश्वनी देवांगन ह बताइस कि मुख्यमंत्री श्री भूपेश बघेल के मंशा के मुताबिक आजीविकामूलक गतिविधि मन ल अधिकाधिक बढ़ावा देहे बर बहुत अकन नवाचारी काम ग्रामीण क्षेत्र के गौठान म सुरू करे गए हे। एखर बर कलेक्टर डॉ सर्वेश्वर नरेंद्र भुरे के हुकुम के मुताबिक एक नवाचार फूल मन के माध्यम ले गुलाल बनाए के घलोक हे। जिला के मंदिर मन म चढ़े फूल मन ल सकेल के एखर से गुलाल बनाए के काम करे जात हे। सांकरा म एखर मेजर यूनिट हे। एखर संगेच नंदोरी, सेलूद कोनारी, मोहलाई आदि म घलोक एसएसजी के महिला मन ये काम करत हें।
विदेश म यूरोपियन यूनियन एक्सपोर्ट के प्रमुख केंद्र, देश म दिल्ली अउ बेंगलुरु म प्रमुख आपूर्ति – सांकरा के ग्राम संगठन के महिला मन कोति ले बनाए गुलाल के एक्सपोर्ट इटली के अलावा यूरोपियन यूनियन के आन देश मन म घलोक होना हे। देश म सबले जादा मांग दिल्ली अऊ बेंगलुरु ले हे जेकर आपूर्ति करे जात हे।
गुलाल अऊ अष्टगंध उपर होवत हे बड़े काम- भविष्य म ग्राम संगठन के महिला मन के लाभांश तेजी ले बढ़े के उम्मीद हे काबर के दुनिया भर म भारतीय समुदाय म अष्टगंध अऊ गुलाल के मांग बहुत जादा हे। इस्कॉन के केंद्र मन म एखर प्रमुख रूप ले मांग होथे। एखर अलावा तिहार के मौका म घलोक दुनियाभर म बगरे भारत के मनखे मन गुलाल अउ अष्टगंध के उपयोग करथें।