आदिवासी विकास ला सांसद संकुल विकास परियोजना ले मिलही गति: मुख्यमंत्री श्री विष्णुदेव साय

रायगढ़, मुख्यमंत्री श्री विष्णुदेव साय ह मुख्यमंत्री निवास कार्यालय म आयोजित सांसद संकुल विकास परियोजना के समीक्षा बैठक ला संबोधित करत कहिन के आदिवासी विकास ला सांसद संकुल विकास परियोजना ले गति मिलही। उमन कहिन के योजना के तहत लोगन मन ला स्वरोजगार ले जोड़े बर महत्वपूर्ण पहल करे जावत हे, एकर ले आदिवासी क्षेत्र मन ले पलायन म रोक लगही।
मुख्यमंत्री श्री साय ह कहिन के प्रधानमंत्री श्री नरेंद्र मोदी के नेतृत्व म आदिवासी क्षेत्र मन ला विकास के मुख्यधारा ले जोड़े के सरलग उदीम करे जात हे। सांसद संकुल विकास परियोजना के तहत गांव मन के क्लस्टर (समूह) बना के विकास के मॉडल विकसित करे जात हे, जेकर सीधा लाभ लोगन मन ला मिलत हे। स्थानीय संसाधन मन के सही उपयोग करके लोगन मन के कौशल विकास कर ओ मन ला स्वरोजगार के दिशा म आगू बढ़ाना ही योजना के उद्देस्य आय।
मुख्यमंत्री ह कहिन के छत्तीसगढ़ राज्य ला धान के कटोरा कहे जाथे। हमर इहां धान के कतको किसम हे जेकर विदेश भेजे के बड़का संभावना हे। खेती के संगे-संग मछरी पालन, छेरी पालन, गऊ पालन, सुअर पालन ले गांव वाला मन ला जोड़ के ओ मन ला आर्थिक रूप ले मजबूत बनाए जा सकत हे। हमर आदिवासी मनखे महुआ, इमली, चार (चिरौंजी) जइसन वनोपज के पुरखौती रूप ले उत्पादन करत आवत हें, एखर वैल्यू एडिशन कर (गुणवत्ता बढ़ा के) बजार ले जोड़े जावत हे।
मुख्यमंत्री श्री साय ह कहिन के राज्य के नवा उद्योग नीति म घलो अनुसूचित जाति-अनुसूचित जनजाति के उद्यमी मन बर विशेष प्रावधान करे गे हे। सांसद संकुल विकास परियोजना ले जुड़े जनप्रतिनिधि अउ विकास सहयोगी सुनिश्चित करंय के आदिवासी क्षेत्र मन म नवा उद्योग नीति के लाभ घलो मिलय। सांसद संकुल विकास परियोजना के बढ़िया क्रियान्वयन (अमल) बर नोडल अधिकारी मन के घलो नियुक्ति करे जाही।
बैठक म श्री वी सतीश ह सांसद संकुल विकास परियोजना के परिकल्पना अउ लक्ष्य ले जुड़े बिंदु मन म प्रकाश डारिन। उमन बताइन के आदिवासी क्षेत्र मन म लोगन मन ला स्वरोजगार ले जोड़ के पलायन रोके के दिशा म योजना के तहत महत्वपूर्ण काम करे जावत हे। ये योजना के तहत गुजरात, राजस्थान, महाराष्ट्र, मध्य प्रदेश, छत्तीसगढ़, झारखंड, ओडिशा अउ पश्चिम बंगाल जइसन आदिवासी बहुल राज्य मन म आम जनता, एनजीओ, जनप्रतिनिधि अउ सरकार के मिल-जुल के प्रयास ले जम्मो विकास करे जावत हे।
कृषि मंत्री श्री रामविचार नेताम ह कहिन के अलग-अलग विभाग ले जुड़े शासकीय अधिकारी घलो संकुल ले जुड़े गांव मन के विकास म अपन भूमिका के पूरा ईमानदारी ले पालन करंय। स्थानीय जरूरत मन के बढ़िया समझ ले कौशल विकास कर लोगन मन ला स्थाई रोजगार के अवसर दे जा सकत हे।
बैठक म रायगढ़ के लैलूंगा संकुल, सरगुजा के परशुरामपुर संकुल, बस्तर के बकावंड संकुल, बलरामपुर के माता राजमोहिनी देवी संकुल अउ केशकाल के धनोरा संकुल म योजना के तहत करे गे काम मन के विस्तार ले जानकारी दे गीस।
ये मौका म सांसद श्री भोजराज नाग, श्री चिंतामणि महाराज, श्री राधेश्याम राठिया, श्री देवेंद्र प्रताप सिंह, विधायक श्रीमती रेणुका सिंह, श्रीमती गोमती साय, श्री प्रसाद इंडेप, श्री कपिल सहस्त्रबुद्धे सहित अलग-अलग विभाग के वरिष्ठ अधिकारी अउ गणमान्य नागरिक उपस्थित रिहिन।