रइपुर, 21 जून 2021 सम्मार। बस्तर, सुकमा अउ बीजापुर जिला म विकास कार्य के लोकार्पण अउ भूमिपूजन कार्यक्रम के बेरा मुख्यमंत्री ह नौजवान मन ले गोठबात करीन। उन आज मुख्यमंत्री ले कहीन कि पर्यटक मन ल अपन खान-पान, रीति-रिवाज अउ कला-परंपरा मन ले परिचित करावत उन ल गरब होथे।
पर्यटक मन ल कैंपिंग के बेरा स्थानीय अउ पारंपरिक खाद्य अउ पेय जइसे चापड़ा चटनी, बासता, बोड़ा, मड़िया अउ पेज पियाथन। उन पारंपरिक खाद्य मन ल अबड़े भाथे । कैंपिंग के संगे संग बोनफायर अउ ट्रैकिंग के तको सुविधा उपलब्ध कराथन । नान्हे-नान्हे जीव-जंतु अउ पेड़-पौधा मन के जानकारी देथन । पर्यटक जब दुबारा बस्तर आए के बात कहिथे त उन मन ल अबड़ बने लागथे। कैम्पिंग के बेरा पर्यटक मन ल रेस्ट हाउस के छोड़ घर-रूके के तको सुविधा देहे जाथे। मुख्यमंत्री दाउ भूपेश बघेल के पूछे म खीरमणि ह बताइन कि पर्यटक मन ल स्थानीय नाच—गाना अउ तिहार मन म तको संघारथन जेकर ले उन ल प्रति व्यक्ति 700 रुपए तक के कमई हो जथे।
पर्यटन विकास समूह तीरथगढ़ के अध्यक्ष श्री प्रभाकर ह बताइन कि जिला प्रशासन कोति ले समूह ल बॉटल-आर्ट के प्रशिक्षण तको देहे गे हवय । एमा पर्यटक मन के उपयोग करके फेंके बोतल मन के कलात्मक कृति बनाए म प्रयोग करे जाथे । ट्रैकिंग के बेरा फर के बीजा ले बने सीड-बॉल के उपयोग वृक्षारोपण म करे जावत हे। मुख्यमंत्री दाउ भूपेश बघेल ह युवा मन ल पर्यटन विकास बर करत बूता बर बधई अउ शुभकामना दींन, संगे—संग उन्कर ओग्गर भविष्य के तको कामना करीन।
