मुख्यमंत्री ह कहिन – राजमाता स्व. श्रीमती देवेंद्र कुमारी सिंहदेव के निधन अपूरणीय क्षति, ओ मन सौम्य छवि के कुशल अउ दूरदर्शी नेता रहिन
रायपुर, 22 फरवरी 2020। मुख्यमंत्री श्री भूपेश बघेल ह आज सरगुजा पैलेस अम्बिकापुर पहुंचके अविभाजित मध्यप्रदेश के पूर्व मंत्री अऊ सरगुजा के राजमाता स्व. श्रीमती देवेन्द्र कुमारी सिंहदेव ल श्रद्धांजलि अर्पित करिन। छत्तीसगढ़ के कैबिनेट मंत्री श्री टी.एस. सिंहदेव के माताजी स्व. श्रीमती देवेन्द्र कुमारी सिंहदेव के बीते 10 फरवरी ल निधन हो गए रहिस।
मुख्यमंत्री श्री बघेल ह शोक संतप्त परिवारजन ले भेंट करके अपन संवेदना व्यक्त करिन। मुख्यमंत्री ह स्व. श्रीमती देवेंद्र कुमारी सिंहदेव के निधन ल अपूरणीय क्षति कहिन। मुख्यमंत्री ह कहिन कि ओ मन सौम्य छबि के कुशल अउ दूरदर्शी नेता रहिन। ए अवसर म प्रदेश के शिक्षा मंत्री डॉ. प्रेमसाय सिंह टेकाम, खाद्य मंत्री श्री अमरजीत भगत, सरगुजा विकास प्राधिकरण के अध्यक्ष श्री खेलसाय सिंह, लुण्ड्रा के विधायक डॉ. प्रीतम राम, रामानुजगंज विधायक श्री वृहस्पत सिंह, बिलासपुर के विधायक श्री शैलेष पांडेय संग बड़ संख्या म जनप्रतिनिधिगण, मुख्यमंत्री के प्रमुख सचिव श्री गौरव द्विवेदी, संग वरिष्ठ अधिकारी अउ आन विशिष्टजन मौजूद रहिन।
