योग सरल, सस्ता अउ सुलभ माध्यम हरे, जेला अपनाके हम वर्तमान अउ भविष्य के खतरा मन ले खुद ल बचा सकत हन: दाउ भूपेश बघेल

रइपुर, 31 मई 2021 सम्मार। मुख्यमंत्री दाउ भूपेश बघेल ह कहीन कि योग ह एक सरल, सस्ता अउ सुलभ माध्यम हरे, जेला अपनाके हम वर्तमान अउ भविष्य के खतरा मन ले खुद ल बचा सकत हन। मुख्यमंत्री आज अपन घरू कार्यालय म अंतर्राष्ट्रीय धूम्रपान निषेध दिवस के अवसर म वीडियो कांफ्रेंसिंग ले प्रदेशव्यापी वर्चुअल योगाभ्यास अउ योग परामर्श कार्यक्रम के शुभारंभ करत ये बात कहीन। ये कार्यक्रम छत्तीसगढ़ योग आयोग कोति ले कोविड-19 के चिकित्सा ले स्वस्थ होए व्यक्ति, होम आइसोलेशन अउ क्वारेंटाइन म राहत व्यक्ति, उंकर परिवार के सदस्य, वैक्सीन के पहिली खुराक ले चुके व्यक्ति अउ वरिष्ठ नागरिक मन के संगे संग जन सामान्य म कोविड-19 के प्रभाव ल कम करे अउ रोग प्रतिरोधक क्षमता बढ़ाए के उद्देश्य ले प्रारंभ करे गे हे। योग के निःशुल्क वर्चुअल कक्षा 31 मई ले अवइया एक बछर तक चलही। ये कार्यक्रम के माध्यम ले योग के शिक्षा ल जन-जन तक पहुंचाए जाही।
आज ले योग कक्षा सरलग चलही। सोशल मीडिया म इंकर सोज्झे प्रसारण होही, रिकार्डिंग तको उपलब्ध रहही। कोनो भी, कभू भी, ये कक्षा मन के लाभ उठा सकत हे। जूम एप, गूगल मीट, सिस्को वेब एक्स आदि के माध्यम ले ये योग कक्षा मन ले लाइव जुड़के तको एकर लाभ उठाये जा सकत हे।
कार्यक्रम के अध्यक्षता समाज कल्याण मंत्री अउ छत्तीसगढ़ योग आयोग के अध्यक्षा श्रीमती अनिला भेंड़िया ह करीन ।
मुख्यमंत्री ह ये बेरा म कांकेर के सियनहा नागरिक श्री संजय काशी, छत्तीसगढ़ योग आयोग के फिजियोथैरेपिस्ट डॉ. शरद तिवारी, योग प्रशिक्षक श्री पुष्कर चौबे ले वीडियो कॉन्फ्रेंसिंग ले चर्चा तको करीन। ओतका बेर योगाभ्यास के वर्चुअल प्रदर्शन तको करे गइस । समाज कल्याण विभाग के सचिव श्रीमती रीना बाबा साहेब कंगाले ह कार्यक्रम के रूपरेखा उपर प्रकाश डारिन। संचालक, समाज कल्याण श्री पी. दयानंद ह तको कार्यक्रम के बारे म फरिहा के जानकारी दीन।