जल्दी आगू आही सारंगढ़-बिलाईगढ़ जिला : श्री भूपेश बघेल

रायपुर, मुख्यमंत्री श्री भूपेश बघेल ह कहिन कि सारंगढ़-बिलाईगढ़ जिला जल्दी अस्तित्व म आही। एखर बर जल्दीच ओएसडी के नियुक्ति करे जाही। मुख्यमंत्री बलौदाबाजार-भाटापारा जिला के बिलाईगढ़ विकासखंड के ग्राम सलौनीकला म आयोजित चंद्रनाहू (चंद्रा) विकास महासमिति के 76वाँ वार्षिक अधिवेशन ल सम्बोधित करत रहिन।
श्री बघेल ह सम्मेलन ल सम्बोधित करत ग्राम सलौनीकला म चंद्रा समाज के सामाजिक भवन बर 30 लाख रूपिया के स्वीकृति के घोषणा करिन। संगेच उमन रायपुर के अमलीडीह म समाज के भवन बर कलेक्टर गाइडलाइंस दर के 10 प्रतिशत मूल्य म जमीन उपलब्‍ध कराए के घोषणा करिन। उमन क्षेत्र म सिंचाई सुविधा के विस्तार बर जोंक डायवर्सन अर्जुनी के ऊँचाई बढ़ाए बर विभागीय परीक्षण करे के निर्देश विभागीय अधिकारी मन ल दीन। कार्यक्रम म चंद्रनाहू समाज के महिला मन कोति ले बनाय गए करीबन 100 किलोग्राम छत्तीसगढ़ी व्यंजन अईरसा रोटी ले तउल के मुख्यमंत्री के स्वागत करे गीस।
सम्मेलन के अध्यक्षता चंद्रनाहू (चंद्रा) विकास महासमिति के केन्द्रीय अध्यक्ष रामरतन चंद्रा ह करिन। ये बेरा म स्कूल शिक्षा मंत्री डॉ. प्रेमसाय सिंह टेकाम, संसदीय सचिव अउर विधायक श्री चन्द्रदेव राय, संसदीय सचिव श्री शिशु पाल सोरी, राजिम विधायक श्री अमितेश शुक्ल, सारँगढ़ विधायक श्रीमती उत्तरी जांगड़े, जैजैपुर विधायक श्री केशव प्रसाद चंद्रा समेत सबो स्थानीय जनप्रतिनिधि समाज के प्रमुख पदाधिकारी गण कलेक्टर श्री डोमन सिंह अउर एसपी श्री दीपक झा उपस्थित रहिन। संगेच मौका म बड़ संख्या म ग्रामीण अऊ दूर दराज ले अवइया चंद्रनाहू समाज के राजप्रधान, पदाधिकारी व सामाजिक कार्यकर्ता उपस्थित रहिन।