नवा जिला के विकास बर कई नवा काम होही, अधिकारी जिम्मेदारी लव अऊ काम करव: मुख्यमंत्री श्री बघेल

सारंगढ़-बिलाईगढ़, मुख्यमंत्री श्री भूपेश बघेल ह आज नवगठित सारंगढ़-बिलाईगढ़ जिला भेंट-मुलाकात के बेरा म बिलाईगढ़ रेस्ट हाउस म अधिकारी मन के समीक्षा बैठक लीन। मुख्यमंत्री श्री बघेल ह आम जनता ले आदिम जाति विकास विभाग के बारे म मिले लेन-देन के शिकायत ल गंभीरता ले लेत शिकायत मन के जांच करके ओखर निराकरण के निर्देश दीन। उमन अधिकारी मन ले कहिन कि सारंगढ़-बिलाईगढ़ नवा जिला बने हे। ये नवा जिला के विकास बर कई नवा काम कराए जाही। अधिकारी जिला के विकास बर मेहनत, जवाबदारी अऊ बेहतर तरीका ले काम करव। उमन कहिन कि जिला म गौठान के तेजी ले निर्माण करव, ये रोजगार के अच्छा जरिया हे। एखर से पलायनल रोक सकत हन। मुख्यमंत्री श्री भूपेश बघेल ह ये बेरा म बिलाईगढ़ स्थित रेस्ट हाउस म पौधा घलोक लगाइन।
मुख्यमंत्री श्री बघेल ह अधिकारी मन ल नवा परिवार के राशन कार्ड अऊ सांवरा जाति के लइका मन बर जाति प्रमाण पत्र बनाए के निर्देश दीन। उमन योजना मन के समीक्षा करत कहिन कि जेन जगा म सामुदायिक अऊ व्यक्तिगत वनाधिकार के शिकायत आगू आए हे, ओखर प्राथमिकता ले निराकरण करव। धान खरीदी म कोनो शिकायत नइ आए हे, बस पेमेंट सिसटम देख लेव। मुख्यमंत्री ह कहिन कि ये दुर्गम क्षेत्र नइ हे, इहां बिजली के शिकायत बिल्कुल नइ आना चाही। विशेषकर मध्य के जिला मन म समस्या नइ होना चाही।
ये बेरा म आदिम जाति अऊ अनुसूचित जाति विकास मंत्री डॉ. प्रेमसाय सिंह टेकाम, बिलाईगढ़ विधायक अउ संसदीय सचिव श्री चंद्रदेव प्रसाद राय, मुख्यमंत्री के सचिव श्री अंकित आनंद, बिलासपुर संभाग के कमिश्नर डॉ. संजय अलंग, पुलिस महानिरीक्षक श्री बी.एन. मीणा, सारंगढ़-बिलाईगढ़ कलेक्टर डॉ. फरिहा आलम सिद्धिकी, बलौदाबाजार-भाटापारा कलेक्टर श्री रजत बंसल घलोक उपस्थित रहिन।