शासकीय हाईस्कूल सिथरा के 24 छात्रा मन ल मिलीस साइकिल

सांसद ह विद्यालय परिसर म साइकिल स्टैण्ड निर्माण खातिर 3 लाख रूपिया देहे के करिन घोषणा
छात्रा मनके स्कूल के रद्दा होही आसान
रायगढ़, शासन के महत्वाकांक्षी निःशुल्क सरस्वती सायकल योजना अंतर्गत विकासखण्ड धरमजयगढ़ के शासकीय हाईस्कूल सिथरा म लोकसभा सांसद रायगढ श्री राधेश्याम राठिया ह विद्यालय के 24 छात्रा मन ल साइकिल बांटिन। उमन कहिन के शिक्षा ही वो साधन हे जेन ग्रामीण अंचल के बेटी मन ल आत्मनिर्भर अऊ सशक्त बनाथे।
ए बेरा म सांसद श्री राठिया ह छात्रा मन ल मेहनत, निष्ठा अऊ ईमानदारी के संग अध्ययन करत जीवन के हर एक क्षेत्र म उत्कृष्ट प्रदर्शन करे बर प्रेरित करिन। उमन उपस्थित सबो छात्र-छात्रा मन के उज्जवल भविष्य के कामना करत कहिन के ओ मन मेहनत करके अध्ययन करत समाज अऊ देश के नाव रोशन करंय। विद्यालय परिवार अऊ पढ़ईया लईका मन के मांग म सांसद श्री राठिया ह विद्यालय परिसर म साइकिल स्टैण्ड निर्माण खातिर 3 लाख रूपिया के राशि देहे के घोषणा करिन। बालिका मन ह साइकिल मिले म सांसद के आभार व्यक्त करिन अऊ बेहतर भविष्य के सपना ल साकार करे के संकल्प लीन। ए बेरा म जनप्रतिनिधिगण, गणमान्य नागरिक, अभिभावक, प्राचार्य, शिक्षक-शिक्षिका मन अऊ बड़ संख्या म छात्र-छात्रा मन उपस्थित रहिन।