अंबिकापुर, पर्यटन अउ संस्कृति मंत्री श्री राजेश अग्रवाल ह सरगुजा के शासकीय उच्चतर माध्यमिक विद्यालय मेंड्राकला म सरस्वती साइकिल योजना के तहत छात्रा मन ल साइकिल बांटिन। मंत्री श्री राजेश अग्रवाल ह समारोह ल संबोधित करत कहिन के आज सरस्वती साइकिल योजना के तहत छात्रा मन ल साइकिल वितरण करे गे हे। ए साइकिल उंकर बर सिरिफ एक ठन साधन नो हे, भलुक आत्मनिर्भरता अउ आगू बढ़े के प्रेरणा ए। सरस्वती साइकिल योजना ग्रामीण अउ दूरिहा क्षेत्र के बेटी मन ल शिक्षा ले जोड़े म महत्वपूर्ण भूमिका निभात हे। सबो बेटी मन ल उज्ज्वल भविष्य के शुभकामना।
उमन बताइन के ए योजना के उद्देश्य ग्रामीण क्षेत्र के लईका (टूरीज) मन ल स्कूल आये-जाये म सुविधा देना हे, ताकि वो मन शिक्षा ले वंचित झन रहंय। सरगुजा जिला के दूरिहा इलाका म रहे वाला कतको छात्रा मन पैदल लंबा दूरी तय करत रहिन, फेर अब ए साइकिल ले न केवल समय बांचही, भलुक उंकर सुरक्षा अउ आत्मविश्वास घलो बढ़ही। मंत्री श्री अग्रवाल ह कार्यक्रम म छात्रा मन ले कहिन के वो मन ए साइकिल के उपयोग शिक्षा के साधन के रूप म करंय अउ अपन सपना ल पूरा करंय। उमन ग्रामीण विकास अउ बेटी बचाओ-बेटी पढ़ाओ अभियान ले एकर जुड़ाव बतावत कहिन के छत्तीसगढ़ सरकार कन्या शिक्षा ल प्राथमिकता देवत हे। स्थानीय पंचायत प्रतिनिधि अउ पालक मन ह ए पहल के सराहना करिन। उमन बताइन के एकर ले छात्रा मन के स्कूल छोड़े के (ड्रॉपआउट) दर कम होही अउ क्षेत्र म साक्षरता के स्तर बढ़ही।
पर्यटन अउ संस्कृति मंत्री श्री राजेश अग्रवाल ह सरस्वती साइकिल योजना के तहत मेन्ड्रा कला स्कूल म छात्रा मन ल बांटिन साइकिल
