सूरजपुर, सासन के सरस्वती सायकल योजना ह बेटी मन के शिक्षा, सशक्तिकरण अउ आत्मनिर्भरता ल बढ़ावा दे के डहर म एक बड़का पहल साबित होवत हे। ए योजना के तहत छात्रा मन ल मुफत म सायकल देहे जात हे, जेकर ले ओमन ल स्कूल आए-जाए म सुबिधा मिलत हे अउ बखत संग सरीर के ताकत के घलो बचत होत हे।
सूरजपुर जिला के शासकीय उच्चतर माध्यमिक स्कूल, चंदन नगर (विकासखंड प्रेमनगर) के छात्रा कु. मायावती ल योजना के तहत मुफत म सायकल देहे गीस। मायावती के स्कूल ह ओकर घर ले लगभग 4 किलोमीटर दूरिहा हे। पहिली ओला रोज पैदल स्कूल आए-जाए बर परत रहिस, जेकर ले सरीर म थकावट के संगे-संग पढ़ाई बर मिलइया जरूरी बखत घलो कम हो जावत रहिस।
योजना बनिस उम्मीद के किरन
सरस्वती निःशुल्क सायकल योजना के लाभ मिले के बाद मायावती के जीवन ह बहुत बदल गे हे। अब ओहा रोज सायकल ले स्कूल पहुँचथे। जादा दूरी अब ओकर बर रुकावट नइ हे, बल्कि ओकर रस्ता ह सुरक्षित, असान अउ खुसी वाला बन गे हे। सायकल मिले ले बखत के बचत होत हे, जेकर ले ओहा पढ़ाई म जादा धियान दे पावत हे। स्कूल म ओकर हाजिरी ह घलो रोज के हो गे हे अउ ओकर आतमबिसवास म घलो बढ़ोत्तरी देखे ल मिले हे। मायावती ह सरकार के आभार जतावत कहिस के सरस्वती सायकल योजना ह न केवल ओकर शिक्षा ल सरल बनाए हे, बल्कि ओकर सपना मन ल घलो नवा रस्ता देखाए हे।
शिक्षा अउ सशक्तिकरण कोती मजबूत कदम
सरस्वती सायकल योजना ह बेटी मन ल शिक्षा बर प्रोत्साहित करे अउ ओमन ल आत्मनिर्भर बनाए म असरदार साबित होवत हे। ए योजना ह नइ केवल छात्रा मन ल सुबिधा देवत हे, बल्कि ओकर उज्वल भविस्स के नेव ल घलो मजबूत करत हे।