गांव वाले मन के संग भूंइया म बइठ के जवाफूल, उरिद के बरा अऊ आमा के अथान झड़किन
रायपुर, मुख्यमंत्री श्री भूपेश बघेल भेंट मुलाकात के सातवा दिन काली सरगुजा (अम्बिकापुर) जिला के विधानसभा क्षेत्र लुण्ड्रा के
ग्राम करजी पहुंचिन। उमन करजी के गांव वाले मन के संग भूंइया म बइठ के चूल्हा म पके ठेठ सरगुजिया जेवन खाइन।
मुख्यमंत्री ग्राम करजी के अवधेश प्रजापति के घर पहुंचिन अऊ उहां गांव वाले मन के संग भूइंया म बइठ के जेवन करिन।
प्रजापति परिवार ह मुख्यमंत्री श्री बघेल ल माटी के चूल्हा म बने ठेठ सरगुजिया जेवन परूसिन। उमन चेंच भाजी (लकड़ा) के
रसदार साग, उरिद दार के बरा (बड़ा), जवाफूल चावल, राहेर दार, आमा के अथान अऊ पापर के सुवाद लीन। ये बेरा म
मुख्यमंत्री ह गांव वाले मन के संग खेती-किसानी संग गांव के मुद्दा म चर्चा करिन। उमन श्री प्रजापति के परिवार वाले मन ले
मुलाकात कर के उंखर हाल-चाल जानिन अऊ महिला मन ल लुगरा भेंट करिन। ये मौका म श्री प्रजापति के बेटी मधुलिका ह
ओ मन ल अपन कोति ले चारकोल पेंसिल ले बने उंखर भेंट करिन। मुख्यमंत्री ह मधुलिका के चित्रकारी के हुनर के तारीफ
करिन अऊ बधाई दीन।