जांजगीर-चांपा, 29 अगस्त, 2021 शनिच्चर। जांजगीर-चांपा जिला के दिव्यांग बास्केटबॉल खेलाड़ी अनीता के प्रतिभा ल निखारे बर छत्तीसगढ़ सरकार हरसंभव मदद करत हावय। मुख्यमंत्री दाउ भूपेश बघेल ह अनीता ल अपन स्वेच्छानुदान मद ले दू लाख रुपिया के सहायता दीन उहेचे आनी बानी के योजना मन ले अनीता ल सरलग लाभान्वित करे जावत हावय।
दिव्यांगता अभिशाप नही, वरदान हरे येला जिला के दिव्यांग बेटी सुश्री अनिता बघेल ह सिद्ध कर दीस। सुश्री अनिता ह छत्तीसगढ़ राज्य के व्हील चेयर बास्केटबॉल महिला टीम के नेतृत्व करत चतुर्थ राष्ट्रीय व्हीलचेयर बास्केटबॉल चैम्पीयनशीप (बछर 2017)हैदराबाद, पंचम राष्ट्रीय व्हीलचेयर बास्केटबॉल चैम्पीयनशीप(बछर 2018) तमीलनाडु अउ षष्ठम राष्ट्रीय व्हीलचेयर बास्केटबॉल चैम्पीयनशीप (बछर 2019) मोहाली म सहभागिता करीन।
05 बछर के उमर ले ही बीमार परे ले अनीता दूनो गोड़ ले अपंग होगे। तभो ले वोह एम. एस. सी. (जूलॉजी), बी.एड., पीजीडीसीए के परीक्षा उत्तीर्ण करके एम.एड. द्वितीय सेमेस्टर म अध्ययनरत हे पढ़ई के संगे— संग खेल म उन्कर गाहिरी चिभिक हे ।
अनीता ह राष्ट्रीय व्हील चेयर बास्केटबॉल चैम्पियनशीप म तीन पइत सहभागिता करे हे। अनिता बघेल का जनम किसान परिवार म जांजगीर-चांपा जिला के जनपद पंचायत जैजैपुर के ग्राम मुक्ता म होए हे। ओकर 5 भाई एक 1 बहिनी हवय। वोह नान्हेपन ले कुशाग्र बुद्धि के हवय, पढ़ई के संग खेलकूद म अव्वल रहय। बैशाखी के सहारा चलत अनीता दृढ़ विश्वास के संग सरलग अपन लक्ष्य कोति आगू बाढ़त हवय।
समाज कल्याण विभाग कोति ले ओला इंदिरा गांधी राष्ट्रीय दिव्यांग पेंशन योजनान्तर्गत 500 रूपिया हरेक महीना, निःशक्तजन शिक्षा प्रोत्साहन योजनान्तर्गत 6000 रुपिया हर बछर (स्नातक अउ स्नातकोत्तर कोर्स) के बेरा, आए —जाए बर मोटराईज्ड ट्रायसायकिल, शिक्षा ऋण म सहयोग अउ रोजगार बर ओला समाज कल्याण विभाग कोति ले अनुदानित वृद्धाश्रम म अवसर देहे गे हवय।
मुख्यमंत्री दाउ भूपेश बघेल के जांजगीर-चांपा जिला भ्रमण के बेरा युवा मन ले चर्चा कार्यक्रम म अनिता ल तको समाज कल्याण कोति ले दिव्यांग युवा प्रतिनिधि के रूप म सहभागी बने अवसर दिए रिहिन तब संवेदनशील मुख्यमंत्री दाउ भूपेश बघेल कोति ले अनीता के खेल प्रतिभा ल प्रोत्साहित करे बर ओला स्वेच्छानुदान मद ले दू लाख रुपिया देहे के घोषणा करे गे रिहिस। ये राशि ओकर खाता म अंतरित कर देहे गे हवय।
