रायपुर, छत्तीसगढ़ सरकार कोति ले घरेलू उपभोक्ता मन ल 400 यूनिट तक बिजली खपत होए म बिजली बिल आधा करे के निर्णय ले बिलासपुर शहर के चांटीडीह म रहइया गरीब साग-भाजी बेंचईया श्रीमती कंचन, सरोज, श्यामा बाई, रिटायर्ड कर्मचारी लखन, निर्मल, हरिप्रसाद आदि ल बहुत राहत मिले हे। बिजली बिल के बचत ले अब ओ मन अपन आन जरूरत मन म पइसा खरचा कर पाहीं।
चांटीडीह निवासी सरोज बाई अऊ कंचन बाई हप्तही बाजार मन म साग-भाजी बेंचथें अउ परिवार पोंसथे। बड़े परिवार होए ले ऊंखर घर के खरचा एखर से मुश्किल से चलथे। ऊपर ले हर महिना भारी बिजली बिल ह उंखर तकलीप ल अउ बढ़ा देवत रहिस। अब पाछू दू महिना ले उंखर बिजली बिल आधा हो गए हे। पहिली औसत दू सौ यूनिट बिजली खपत होए घलव ओ मन ल हजार रूपिया ले जादा बिजली बिल पटाए ल परता रहिस। फेर पाछू दू महीना ले करीबन 170 रूपिया के बिजली बिल आवत हे। साग-भाजी बेंचईया श्यामा बाई साहू के घर घलोक पहिली हर महिना डेढ़ हजार रूपिया ले जादा के बिजली बिल आता रहिस। दू महिना ले अतकेच बिजली खपत म ओखर बिल 7 सौ रूपिया तक आवत हे। श्यामा बाई घलोक अब राहत महसूस करत हे।
इही बेरा म रिटायर्ड बैंककर्मी लखन लाल यादव ह बताइस कि ओला घलोक हर महिना दू हजार रूपिया ले घलोक जादा बिजली बिल पटाना परत रहिस, फेर अब हजार रूपिया तक आवत हे। सरकार के फैसला ह ओला ये भीषण गरमी म बड़ राहत दिए हे। अब जादा बिजली बिल पटाए के चिंता ले मुक्त होके वो अऊ ओखर परिवार मगन होके कूलर अउ पंखा के हवा लेवत हे। चांटीडीह के ही रिटायर्ड चतुर्थ श्रेणी कर्मी निर्मल दास, हरिप्रसाद मिश्रा मन ह घलोक सरकार के बिजली बिल आधा करे के निर्णय ल राहत वाला निर्णय बताइन।
सरकार के निर्णय ले बिलासपुर शहर के करीबन 63 हजार घरेलू उपभोक्ता लाभान्वित होवत हें। ओ मन ल 400 यूनिट तक बिजली के खपत म 5.30 रूपिया के जगा म केवल 2.57 रूपिया प्रति यूनिट के दर ले बिजली के भुगतान करना परत हे।
