सारूडीह स्व-सहायता समूह ल डेयरी ले हर महिना होवत हे 1 लाख के आमदानी

जशपुरनगर, जशपुर जिला म स्व-सहायता समूह ल कई ठन शासकीय योजना ले जोड़के ओ मन ल आर्थिक रूप ले सक्षम बनाए जात हे। इही कड़ी म साल 2019-20 राज्य पोषित डेयरी उद्यमिता विकास योजना अंतर्गत सारूडीह चाय बगान स्व-सहायता के समूह ल कुल तीन इकाई 6 नग गाय पशुधन विकास विभाग जिला जशपुर कोति ले अनुदान राशि रू. 2.7972 लाख प्रदाय करे गीस।
समूह के सदस्य ह बताइस कि समूह ल 6 नग गाय ले रोजेच 45 ले 50 लीटर दूध रोजेच मिलत हे। जेखर से समूह ल रोजेच दू हजार ले ढाई हजार रूपिया के आमदनी होए लगे हे। समूह ह बताइस कि गाय पालन ले वो मन ल बहुत अच्छा आमदनी होए लगे हे। जेखर से ओ मन बने उत्साहित होए हें अऊ अभी हाल म छै ठन गाय अऊ बिसाए हें। अब ओ मन ल रोजेच 70 ले 80 लीटर दूध मिलत हे। जेखर से ओ मन ल महिना म करीबन एक लाख ले जादा के आय होवत हे। समूह के सदस्य मन ह बताइन कि विभाग के अधिकारी-कर्मचारी मन सरलग ओ मन ल प्रोत्साहन घलोक देवत हे। संगेच पशु चिकित्‍सा विभाग ह बेरा-बेरा म भ्रमण करके कृत्रिम गर्भाधान, उपचार अऊ मार्ग दर्शन देवत हें। जेखर से ओ मन ल पशु मन के उपचार अऊ पालन पोषण करे म कोनो प्रकार के दिक्कत के सामना नइ करना परत हे। उमन बताइन कि डेयरी के बाद मासिक आय म बढोत्तरी होए ले समूह के सदस्य मन के प्रतिव्यक्ति आय म बढोत्तरी होए हे। जेखर से सबो सदस्य मन के मन म डेयरी के काम म रूचि बाढ़े हे।