अब श्रवण ल हर महिना मिलही पेंशन : दुगली शिविर म कलेक्टर ह दीन स्वीकृति

रायपुर, पाछू नौ साल ले आँखी के अंधरौटी अऊ तकलीफ ले जूझत श्रवण कुमार ल आज बड़ राहत मिलीस। अब ओ ल हर महिना न केवल इंदिरा गांधी राष्ट्रीय दिव्यांग पेंशन मिलही भलुक स्वास्थ्य विभाग कोति ले ऊंखर आंखीं के जांच करके यथासंभव इलाज घलोक करे जाही। धमतरी जिला के नगरी वनांचल दुगली स्थित वन विभाग के क्षमता विस्तार केंद्र म रखे गे विशेष शिविर म 55 साल के श्री श्रवण ह कलेक्टर श्री रजत बंसल ल अपन पीरा बताइस कि ओ ह पेशा ले वाहन चालक रहे हे, फेर धीरे-धीरे उंखर आंखीं के रौशनी कम होए लगीस। एखर से ओ ल दिखना पूरा बंद हो गए हे। जेकर सेती परिवार के पालन पोषण म घलोक दिक्कत होए लगे हे।

दुगली निवासी श्री श्रवण कुमार ह निःशक्तता के आधार म शासन ले मदद के बिनती करिन अऊ आज इही भरोसा म ओ ह शिविर म अपन बेटा के संग पहुँचिस। उंखर तकलीफ ल सुनके कलेक्टर ह जनपद सीईओ नगरी ल एला विशेष प्रकरण मानत तुरंते श्री श्रवण के पेंशन स्वीकृत करे ल कहिन। उमन संगेच मुख्य चिकित्सा अऊ स्वास्थ्य अधिकारी डॉ डी.के.तुर्रे ल निर्देशित करिस कि ओ मन आवेदक के आंखीं के जांच करके ऊंखर ईलाज के पूरा कोसिस करव। श्रवण कुमार हर महीना 500 रूपिया के पेंशन मिले के बात सुनके अड़बड़ खुस होइस अऊ आंखीं के इलाज बर घलोक तियार हो गे। एकर पहिली ओ ह ईलाज बर जागरूक नइ रहिस। अब ओ ह संतुष्ट हे कि जिला प्रशासन कोति ले जनहित ल ध्यान म रखत जऊन शिविर के आयोजन करे गीस, वो सही म सार्थक साबित होय हे।