– कहिन पंजीयन बर जादा काउंटर खोलव, नजीक के फीवर सेंटर के बारे म घलोक देवव जानकारी ताकि जिला अस्पताल म अड़बड़ भीड़ झन होवय
दुर्ग 12 सितंबर 2020। कलेक्टर डॉ. सर्वेश्वर नरेंद्र भुरे आज जिला अस्पताल पहुंचिन। उहां उमन कोरोना सैंपल लेहे बर बनाये गए रजिस्ट्रेशन केंद्र के निरीक्षण करिन। सैंपल देहे पहुंचे नागरिक मन लाइन म तो रहिन फेर बने सहिन सोशल डिस्टेंसिंग के अभाव रहिस, ए बात म कलेक्टर ह जोरदरहा नाराजगी जाहिर करिन। उमन अस्पताल प्रबंधन ले कहिन के अभी सैंपल बर आये मनखे मन के बीच सोशल डिस्टेंसिंग बनाना सर्वोच्च प्राथमिकता हे। एखर बर जऊन निरधारित दु गज के दूरी हे। ओखर पालन करावव। उमन कहिन के अस्पताल प्रबंधन ये देखय के जऊन मनखे मन ल इहां सोशल डिस्टेंसिंग बनाए के ड्यूटी दे गए हे ओ मन एकर गंभीरता ले पालन करत हें या नहीं। एखर संगेच अस्पताल म सुरक्षा बर जऊन एजेंसी लगाए गए हे वोखर काम के घलोक समीक्षा करव।
नजिक के फीवर क्लीनिक के नंबर डिस्प्ले करव
उमन कहिन के अधिकांश मनखे जिला अस्पताल म सीधा आथें एखर सेती जिला अस्पताल म दबाव अड़बड़ बाढ़ जाथे फेर नजदीक के फीवर क्लीनिक मन म घलोक जांच के सुविधा हे त एकर जानकारी घलोक इहां डिस्प्ले करके बतावव। एखर से नजदीकी फीवर क्लीनिक के बारे म मनखे मन ल जानकारी घलोक मिलही अऊ एखर से जिला अस्पताल म भीड़ कम होही।
रजिस्ट्रेशन बर काउंटर्स के संख्या बढ़ावव
कलेक्टर ह रजिस्ट्रेशन बर काउंटर्स के संख्या बढ़ाय के हुकुम घलोक दीन। उमन कहिन के एखर से कागजी प्रक्रिया म लगइया समय कुछ घट जाही। उमन कहिन के ए काम बर वालंटिर्यस के मदद घलोक लेहे जा सकत हे। एसडीएम श्री खेमलाल वर्मा ह बताइस के ए काम बर वालंटियर्स ले संपर्क करे जात हे।
सुरक्षा के रिव्यू अऊ रोटेशन जरूरी
कलेक्टर ह सीएस ले कहिन के सबले जरूरी ये हे के जल्दी ले जल्दी मनखे मन के सैंपल लेहे जाय। ये काम जतका कम समे के होही, भीड़ वोतकेच छंटही अऊ सोशल डिस्टेंसिग बनाए म वोतकेच मदद मिलही। सोशल डिस्टेंसिंग बनाए बर अऊ व्यवस्था बर जऊन मनखे मन ल लगाए गए हे। ऊंखर काम के मानिटरिंग स्वास्थ्य अधिकारी मन सरलग करयं। जिहां काम संतोषजनक नइ हे, उहां बदलाव किरे जाय।
दिक्कत वाले मरीज मन के सैंपलिंग बर अलग व्यवस्था होवय
कलेक्टर ह कहिन के जऊन मनखे मन ल उम्र आधारित या शारीरिक अक्षमता आधारित कोनो समस्या हे उंखर जिला अस्पताल म ही अलग कोनो जगा म सैंपलिंग करे जाय।
