सर्वोदयी नेता स्वर्गीय श्री पंथराम वर्मा ल श्रद्धांजलि देहे मटंग पहुंचिन मुख्यमंत्री श्री भूपेश बघेल

  • – श्रद्धांजलि सभा म कहिन, सार्वजनिक जीवन म रहिन सादा जीवन उच्‍च विचार के चिन्‍हारी, उंखर योगदान अतुलनीय

दुर्ग, मुख्यमंत्री श्री भूपेश बघेल आज सर्वोदयी अऊ गांधीवादी नेता स्वर्गीय श्री पंथराम वर्मा ल श्रद्धांजलि देहे अउ शोक संतप्त परिवार ले मिले पाटन ब्लॉक के ग्राम मटंग पहुंचिन। उमन स्वर्गीय श्री वर्मा के निधन ल अपूरणीय क्षति बताइन। मुख्यमंत्री ह कहिन कि सार्वजनिक जीवन म उमन सादा जीवन जादा विचार के सिद्धांत ल आजीवन अपनाए रखिन। पूरा जीवन बापू के सिद्धान्त म चलत रहिन। चरखा ले सूत कातत रहिन। कोनो विचार ल लेके अइसन दृढ़ता दुर्लभ ही देखे म आथे। गांधी अऊ विनोबा के विचार मन ल उमन आत्मसात करे रहिन। उमन सुदीर्घ अऊ यश भरे जीवन जीइन। अपन पीछू ओ मन अपन मूल्य मन के धरोहर छोड़ गे हें।

सार्वजनिक जीवन म कइसे आचरण होवय, ऊंखर जीवन ले ये आदर्श मिलथे। मुख्यमंत्री ह ये बेरा म स्वर्गीय श्री वर्मा कोति ले भूदान आंदोलन के समय करे गए काम मन के घलोक सुरता करिन। उमन कहिन कि ग्राम मटँग के मनखे मन बर अऊ हम सब बर ये बहुत गौरव के बात हे कि ये गांव अऊ हमर क्षेत्र अतीक यशस्वी नायक के कर्मभूमि रहे हे। मुख्यमंत्री ह कहिन कि राष्ट्र अऊ समाज के संग ही ओखर धर्म ल लेके घलोक चिंतन विशद रहिस। ओ मन अइसन परिवार ले आये रहिन जिहां त्याग के परंपरा रहिस, समाज बर आगू आके काम करे के प्रेरणा रहिस। ओ मन यशस्वी पिता स्वर्गीय उदयराम वर्मा के यशस्वी पुत्र रहिन। आध्यात्मिक क्षेत्र म घलोक उंखर ज्ञान विशद रहिस। ओ मन हमेशा रामायण, महाभारत के उदाहरन देवत रहंय। कर्म अऊ विचार के अइसन सुंदर सुयोग दुर्लभ होथे।

ग्राम बेलौदी म स्वर्गीय प्यारेलाल नायक ल घलोक दीन श्रद्धांजलि– मुख्यमंत्री ह ग्राम बेलौदी म स्वर्गीय प्यारेलाल नायक ल श्रद्धांजलि अर्पित करिन अऊ ऊंखर शोकसंतप्त परिवार ल ढांढस बंधाइन।

आमालोरी म स्वर्गीय गजाबाई ल दीन श्रध्दांजलि– ग्राम आमलोरी म मुख्यमंत्री ह स्वर्गीय गजाबाई ल घलव श्रद्धांजलि दीन। ओ मन श्री अनिल चंद्राकर के माता रहिन। मुख्यमंत्री ह श्री चंद्राकर अउ शोक संतप्त परिजन मन ल ढांढस बंधाइन।

लउछरहा..