आहता बनाए बर 6 लाख रूपिया अऊ नलजल योजना के स्वीकृति करिन घोषणा
रायपुर, श्रम मंत्री डॉ. शिवकुमार डहरिया ह काली आरंग विकासखंड के ग्राम खपरी म समाज के सहयोग ले नवा बने सतनाम भवन (भव्य मंदिर) के लोकार्पण करिन। उमन ए दौरान गांव वाले मन के मांग म सतनाम भवन म आहता निर्माण बर 6 लाख रूपिया देहे के घोषणा करिन अऊ गांव वाले मन ल शुद्ध पेयजल उपलब्ध कराए बर नलकूप खनन के स्वीकृति प्रदान करिन।
डॉ. डहरिया ह कहिन कि परम पूज्य गुरू घासीदास जी के ये भव्य मंदिर आकर्षक हे। उमन कहिन कि सतनाम पंथ गुरू घासीदास जी के बताए रद्दा म चलके गुरू गद्दी स्थापना अऊ गुरू पूजा करत रहव। उमन गांव वाले मन ल आपसी प्रेमभाव अऊ भाई चारा के संग तिहार मनाए के अपील करिन। डॉ. डहरिया ह कहिन कि गुरू घासीदास जी ह अहिंसा के रद्दा म चले के मार्ग प्रशस्त करिन। संगेच सामाजिक कुरीति मन ले दूर रहे के रद्दा देखाइन। उमन हमला पंथ दीन। मनखे-मनखे एक समान गुरू वाक्य बताके सामाजिक समरसता के संग जीए के घलोक रद्दा देखाइन। डॉ. डहरिया ह कहिन कि राज्य सरकार बाबा गुरू घासीदास जी के बताए मार्ग म चलके सरलग प्रदेश के विकास म काम करत हे। हम सबला गांव, प्रदेश अऊ देश के विकास म बाबा जी के रद्दा म चलके सहभागी बने के जरूरत हे। कार्यक्रम म सर्वश्री हरिलाल जांगड़े, पिन्टू कुर्रे, सुनील भतपहली, रेखराज, किसन डहरिया, वेदराम खुटे, मानसिंग कोसरिया, हेमलाल साहू, मनिराम आडिल, हरि बंजारे, गोविंद चंद्राकर संग बड़ी संख्या म ग्रामीण उपस्थित रहिन। नंबर 2861
