किसान मन के खेत मन म छाईस हरियाली
पिनकापार अऊ नवागांव म 55 किसान मन के खेत मन म सोलर पंप लगिस
राजनांदगांव, अब सिंचाई बर सोलर पंप ल पहिचान के जरूरत नइ हे। किसान मन के जागरूता के सेती अब जम्मो गांव म सोलर पंप लग गए हे। सोलर पंप लगे ले किसान मन के आय म दुगुना बढ़ोतरी होए के सेती किसान मन सरलग सोलर पंप स्थापना के मांग करत हें। क्रेडा ह राजनांदगांव जिला म अब तक कुल 4 हजार 116 नग पंप लगावत हे।
छुरिया विकासखण्ड के पिनकापार अऊ नवागांव म महिला मन के जागरूकता के सेती 55 किसान मन के खेत मन म सोलर पंप स्थापित होए हे, जेमां अधिकांश पंप गांव के नदी, नाला, किनारे स्थापित हे जेन कि सरफेस पंप ये। गांव पिनकापार के श्रीमती भोमिन बाई कंवर के खेत म 5 एचपी क्षमता के सोलर पंप स्थापित हे, जिहां करीबन 8-10 एकड़ जमीन हे। पहिली सिंचाई के साधन नइ होए के सेती मानसून उपर उमन ल निर्भर रहना परत रहिस अऊ समय म वर्षा नइ होए के सेती फसल बर्बाद हो जात रहिस। सोलर पंप लगे के पहिली कुल जमीन ले करीबन आय 1 लाख 50 हजार रूपिया होत रहिस। सोलर पंप लगे ले उही खेत मन म अब सिंचाई के बने व्यवस्था होए ले 5-6 लाख रूपिया के धान के उत्पादन होवत हे। धान के फसल कटे के बाद गेहू, चना, सब्जी जइसे भाटा, गोभी, बरबट्टी, टमाटर के उत्पादन होवत हे जेमां करीबन 40 ले 50 हजार रूपिया के अकतहा आय हो जात हे।
पिनकापार के श्रीमति इंदबती यादव, श्री गीतालाल यादव, श्री चैनूराम कंवर, श्री सुकालू राम कंवर मन बताइन के सिंचाई के व्यवस्था के अभाव के सेती खेत बंजर जइसे हो गए रहिस। सोलर पंप लगे के बाद अब प्रति एकड़ आय 30 ले 40 हजार होवत हे। अब जम्मो गांव खुश हे काबर कि गांव म करीबन 55 नग पंप लगे हे अऊ एक दूसर ले सिंचाई बर पानी ले के किसानी काम उमन करत हें।
करमरी गांव के नेमसिंग साहू ह बताइस के कृषि विभाग ले प्रेरणा ले के नाला के तीर म सोलर पंप लगाइस। गांव म कुल 10 किसान मन के इहां सोलर पंप लगे हे। 4 एकड़ जमीन म अब पानी के पूर्ति होए के बाद करीबन 10-11 एकड़ दूसर किसान मन के जमीन म पानी सिंचाई करके सालाना 50-60 हजार रूपिया के आय वोकर होवत हे, धान, चना, गेहूँ, सब्जी तो अकतहा हे। किसान मन के संगें-संग गौठान अऊ चारागाह मन म घलोक सोलर पंप स्थापित करे जात हे। कई अइसे गांव हे जिहां म 15-20 नग पंप स्थापित हे। राज्य शासन कोति ले ‘सौर सुजला‘ योजना अंतर्गत स्थापित होत सोलर पंप के मुख्य उद्देश्य प्रदेश के किसान मन ल सिंचाई सुविधा उपलब्ध कराना हे।
