कौशल प्रशिक्षण प्राप्त करके ग्रामीण युवा अऊ महिला मन ल मिलत हे रोजगार के अवसर

बिलासपुर, एसबीआई ग्रामीण स्वरोजगार प्रशिक्षण संस्थान ले (RSETI) ग्रामीण क्षेत्र के बेरोजगार युवा अऊ महिला मन ल आत्मनिर्भर बने के अवसर मिलत हे। केन्द्र ले कई ठन विधा म कौशल प्रशिक्षण प्राप्त करके युवा स्वरोजगार ले आत्मनिर्भर बनत हें। प्रशिक्षण के बाद बैंक लिंकिंग के माध्यम ले ओ मन ल ऋण के सुविधा घलोक देहे जात हे। विशेषकर बीपीएल कार्डधारी परिवार मन बर ये संस्थान वरदान बनके आगू आए हे जहां ओ मन ल सबो सुविधा निःशुल्क मिलत हे। संस्थान म अभी राज मिस्त्री के प्रशिक्षण देहे जात हे जेमां 22 महिला मन सामिल हे, स्व सहायता समूह के ये महिला मन नइ सिरिफ दीवार बनावत हे, भलुक अपन भविष्य के नींव घलोक मजबूत करत हें। महिला मन ह मुख्यमंत्री श्री विष्णुदेव साय के आभार जतात कहिन के शासन के योजना ले अब ग्रामीण महिला मन घलोक आगू बढ़त हें।
कोनी स्थित प्रशिक्षण केंद्र म एक महिना के राज मिस्त्री प्रशिक्षण बर आए ग्राम तुर्काडीह के श्रीमती ममता यादव अऊ गायत्री खांडे ह बताइस के ओ मन ल इहां न सिरिफ व्यावसायिक ज्ञान मिलत हे, भलुक उंखर आत्मविश्वास घलोक बढ़त हे। हमन कभू नइ सोचे रहेन के हम जइसे गवइंहा महिला मन घलोक तकनीकी प्रशिक्षण प्राप्त कर सकत हन अऊ कुछ कर सकत हन। अब हम खुद काम कर सकबो अऊ दूसर मन ल घलोक सिखा सकबो। ग्राम मानिकपुरी के श्रीमती शांता मरावी ह बताइस के वो खुद मेहनत करके कमाना चाहत रहिस, ओ मन ल जब स्व सहायता समूह ले ए प्रशिक्षण के जानकारी मिलीस, त उमन तुरंते संघर गें।
एसबीआई ग्रामीण स्वरोजगार प्रशिक्षण संस्थान के निदेशक श्री नरेंद्र साहू ह बताइस के संस्थान के मुख्य उद्देश्य ग्रामीण क्षेत्र मन म रह रहत बीपीएल परिवार मन ल व्यावसायिक रूप ले दक्ष बनाना अऊ ओ मन ल आर्थिक रूप ले सशक्त बनाना हे। इहां 18 साल ले ऊपर के  बीपीएल परिवार मन के ग्रामीण युवा अऊ महिला मन, जेन बेरोजगार हे, ओ मन ल कई ठन ट्रेड म प्रशिक्षण देहे जाथे। प्रशिक्षण पूरा होए के बाद ओ मन ल बैंक ले जोड़े जाथे, जेखर से ओ मन स्वरोजगार बर ऋण ले सकंय। एकरे संग हम तकनीकी सहयोग प्रशिक्षण के बाद घलोक जारी रखथन। उमन ये घलोक बताइन के संस्थान हर साल 1000 ले जादा लाभार्थि मन ल प्रशिक्षण देथे। इहां प्रशिक्षण लेवइया युवक अऊ महिला मन दर्जी, ब्यूटी पार्लर, मशरूम उत्पादन, पशुपालन, जैविक खेती, फोटोग्राफी, वीडियोग्राफी, बेकिंग, कुकिंग, बागवानी, ज्वेलरी मेकिंग, मोबाइल रिपेयरिंग जइसे बहुत अकन क्षेत्र मन म दक्षता हासिल करत हें।