मंदिर मन म चढ़े फूल ले बनत हे सुगंधित हर्बल गुलाल

महासमुंद, 01 मार्च 2024।। महासमुंद जिला के ग्राम डोकरपाली बिहान ले जुड़े जय माता दी स्व सहायता समूह के महिला मन ह हर्बल गुलाल तैयार करत हें। हर्बल गुलाल ले चेहरा म कोनो साइड इफेक्ट नइ होवय। महिला मन जे गुलाल तैयार करत हे तेकर कई विशेषता हे। ये मां रंग अऊ सुगंध बर फूल के ही उपयोग करे जात हे। एमा कोनो प्रकार के केमिकल नइ मिलाए जाय, ताकि चेहरा ल कोनो नुकसान झन होवय।
समूह के सदस्य श्रीमती चित्ररेखा दीवान ह बताइस कि पाछू साल होली म 80 किलो हर्बल गुलाल महिला मन ह बनाए रहिन। जेखर से 30 ले 40 हजार रुपिया के आमदनी समूह ल होए रहिस। होली के पर्व के समय बाजार म गुलाब के अड़बड़ माँग बने रहिथे। उमन कहिन कि 10 रु., 20 अऊ 50 रु. के हर्बल गुलाल के पैकेट बाजार म आसानी ले बेंचा जाथे। गुलाल बनाए बर पालक, लालभाजी, हल्दी, जड़ी, बुटी व फूल ले हर्बल गुलाल बनाए के काम करत हें। एखर अलावा मंदिर अउ फूल के बाजार ले निकलइया उपयोग होए फूल पत्ति मन ल सुखाके प्रोसेसिंग यूनिट म पीसके गुलाल तैयार करे जात हे। गुलाब, गेंदा, स्याही फूल के संग चुकंदर, हल्दी, आम अऊ अमरूद के हरी पत्ति मन ल घलोक प्रोसेस करे जात हे। ए पइत घलोक लगभग 60 किलोग्राम गुलाल तैयार कर ले गए हे। जेमां ले आधा मात्रा बेंचा गए हे। गुलाल बहुत अकन रंग म बनाए जात हे जेमां हरियर, गुलाबी, पीला, केसरिया गुलाल सामिल हे।