बीजापुर, राज्य सरकार के जनहितैषी योजना मन के तहत बीजापुर जिला म रेशम बिभाग डहर ले चलाय जावत कोसा बीज केंद्र, मोदकपाल म तसर पालन ला बढ़ावा देय के मनसूबा ले हितग्राही मन ला 5,700 तसर स्वस्थ डिम्ब समूह (अंडा) बांटे गीस।
ए डिम्ब समूह मन के कुल खचर्वा 91,200 रुपिया रहिस। एक म राज्य सरकार हा 79,800 रुपिया के सब्सिडी दीस, जबकि हितग्राही मन ले सिरिफ 11,400 रुपिया के खुद के हिस्सा रहिस। एकर से कम खरचा म सुघर गुनवक्ता वाले तसर बीज उपलब्ध होय ले तसर पालन ला बढ़ावा मिलत हे।
ए योजना के मनसूबा गांव अउ बन-जंगल के इलाका म रहइया लोगन मन के आय ला बढ़ाना अउ उमन ला खुद के रोजगार ले जोड़ना आय। बिभाग डहर ले देहे गे सुघर गुनवक्ता वाले स्वस्थ डिम्ब समूह मन ले सुघर फसल होय के आसा हे। एकर से हितग्राही मन बैज्ञानिक तरीका ले तसर पालन करके जादा आरथिक लाभ कमा सकहीं।
रेशम बिभाग के जानकार मन के मुताबिक, बांटे गे डिम्ब समूह मन ले करीबन 2 लाख कोसा मन के उत्पादन होय के अनुमान हे। एकर से सिरिफ हितग्राही मन के कमई च नई बाढ़ही, भलुक जिला म कोसा उत्पादन ला नवा रफतार घलो मिलही।
रेशम बिभाग हा बताइस के राज्य सरकार के अनुदान म अधारित योजना मन के माध्यम ले हितग्राही मन ला कम खरचा म सुघर तसर बीज देहे जात हे। संग म उमन ला तकनीकी गियान, सीख-पढ़ाई अउ जरूरी संजोग घलो सरलग देहे जाही, जिहां तसर पालन ला बढ़ावा मिलय अउ गांव के परिवार मन बर रोजगार अउ रोजी-रोटी के नवा अवसर बन सकय।
रेशम बिभाग के योजना ले हितग्राही मन ला 79,800 रुपिया के मिलही छूट, टसर पालन ले बाढ़ही कमई
