आज के ए दौर म हर व्यक्ति म वैज्ञानिक दृष्टिकोण के होना अबड़ जरूरी
नवा समस्या ल जुन्ना शोध के अधार म खोले ले समाज ल नई मिल पाए नवा शोध
18वां छत्तीसगढ़ यंग साइंटिस्ट कांग्रेस 2023 के शुभारंभ समारोह म संघरिस मुख्यमंत्री
छत्तीसगढ़ काउंसिल आफ साइंस एंड टेक्नोलाजी अउ पंडित रविशंकर शुक्ल यूनिवर्सिटी रायपुर के तत्वाधान म दू दिवसीय आयोजन
रायपुर, नेहा राठौर के खबर/ बिन वैज्ञानिक सोच के इंसान आघू नई बढ़ सकय, समय समय म नवा नवा खोज ह समाज ल आज वर्तमान के ए स्थिति म पहुंचाए हे। आज के इस दौर म हर व्यक्ति म वैज्ञानिक दृष्टिकोण के होना अबड़ जरूरी हे। ए बारे म सबले पहिली पंडित जवाहर लाल नेहरू जी ह सोचिस। आजादी के बाद ओ ह भारत प वैज्ञानिक दृष्टिकोण ले लैस करे के मुहिम सुरू करिस। पंडित नेहरू जी के सोच रहिस कि जनप्रतिनिधि अउ वैज्ञानिक मन ह तालमेल के संग काम करही त देश के हर समस्या के असानी ले हल हो सकत हे।
ए सब बात छत्तीसगढ़ के मुख्यमंत्री श्री भूपेश बघेल ह आज राजधानी रायपुर के डीडीयू आडिटोरियम म आयोजित दू दिन के 18वां छत्तीसगढ़ यंग साइंटिस्ट कांग्रेस 2023 के सुभारंभ के अवसर म देश भर ले आए युवा वैज्ञानिक मन ल कहीस।
मुख्यमंत्री ह युवा वैज्ञानिक मन ल संबोधित करत हुए कहिस कि जो व्यक्ति सवाल नई करय अउ समाधान नई खोजय वो ह समाज म पाछु रई जाथे। यदि नेहरू जी आधारभूत संरचना निर्मित नई करतीस त हमन घलो अपन पड़ोसी देश मन असन पिछड़े रहितेन लेकिन आज हमन दुनिया से आंख म आंख मिलाके बात कर पाथन। ओ ह कहिस कि देश म जब टीवी के बात होइस त लोगन मन ह हांसय, तिंहा मोबाइल के बारे म तको अइसनहे होइस। लेकिन आज वैज्ञानिक सोच के सेती मोबाइल म ही लोगन मन टीवी देखत हे ।
मुख्यमंत्री ह कहिस कि छत्तीसगढ़ सरकार दुनिया के पहली सरकार हे जेन ह गोबर खरीदत हे। अब गोबर ले वर्मी कंपोस्ट बनत हे। हमन पैरा पराली ल जरोत नई हन गउठान म पहुंचात हन अउ जतका हमन धरती ले लेवत हन ओतका हमन धरती ल वापीस करे के कोशिश घलो करत हन। प्रकृति ज छत्तीसगढ़ म हमन ह अबड़ कन दिए हे, एकर इस्तेमाल कर के हमन रोजगार घलो उत्पन्न करत हन।
18वां छत्तीसगढ़ यंग साइंटिस्ट कांग्रेस 2023 के सुभारंभ समारोह म मुख्यमंत्री के सलाहकार श्री प्रदीप शर्मा, पंडित रविशंकर शुक्ल विश्वविद्यालय के कुलपति प्रोफेसर सच्चिदानंद शुक्ल, छत्तीसगढ़ यंग साइंटिस्ट कांग्रेस 2023 के अध्यक्ष प्रोफेसर कल्लोल के घोष अउ प्रोफेसर शम्स परवेज, छत्तीसगढ़ काउंसिल आफ साइंस एंड टेक्नोलाजी के महानिदेशक डॉ एस कर्माकर समेत देश भर ले आए युवा वैज्ञानिक उपस्थित रहिन हे।
