‘स्कूटी दीदी’ बनिस आत्मनिर्भर भारत के चिनहारी – मुख्यमंत्री श्री विष्णु देव साय ह सहराइन एनु के जज़्बा

छत्तीसगढ़ के बेटी मन अब केवल लाभार्थी न हीं, बनत हें सामाजिक बदलाव के वाहक- मुख्यमंत्री
भारत सरकार के ग्रामीण विकास मंत्रालय ह करिस सराहना
धमतरी, छत्तीसगढ़ के धमतरी जिला के एक छोट कन गांव उमरदा के निवासी एनु आज पूरा देश म “स्कूटी दीदी” के नाम ले जाने जाथे। मुख्यमंत्री श्री विष्णु देव साय ह एनु के जीवटता, आत्मनिर्भरता अऊ ग्रामीण महिला मन के सशक्तिकरण के दिशा म वोखर योगदान के मुक्‍त कंठ ले सराहना करत कहिन कि एनु जइसे बेटी मन ही आत्मनिर्भर भारत के असली पहिचान हे। ऊंखर साहस, समर्पण अऊ संकल्प ले छत्तीसगढ़ के गांव मन के तस्वीर बदलत हे।
एनु के प्रेरक यात्रा ए बात के प्रमाण हे के कहूं मन म कुछ कर गुजरे के जज़्बा होवय, त संसाधन मन के कमी, सामाजिक दबाव अऊ परंपरागत सोच घलोक रद्दा नइ रोक सकय। एक सादा ग्रामीण परिवार म जन्मे एनु ह कठिन परिस्थिति मन म घलोक अपन पढ़ई जारी रखिस अऊ अर्थशास्त्र म स्नातकोत्तर के उपाधि प्राप्त करिस। एखर बाद वो ह छत्तीसगढ़ राज्य ग्रामीण आजीविका मिशन ‘बिहान’ ले जुड़के सिलाई-कढ़ाई के प्रशिक्षण लीस, एक लाख रूपिया के करजा प्राप्त करिस, अऊ समय म करजा ल चुकता कर आर्थिक अनुशासन के मिसाल पेश करिस।
एनु ल समझ रहिस के ग्रामीण महिला मन के सशक्तिकरण बर गतिशीलता बहुत जरूरी हे। वो ह ‘प्रथम संस्था’ ले स्कूटी चलाना सिखिस अऊ शुरुआत म समाज के ताना अऊ व्यंग्य के बावजूद अपन आत्मविश्वास बनाए रखिस अऊ हार नइ मानिस। जब ओ गांव-गांव स्कूटी ले महिला मन ले जुड़े लगिस, तभे ओ ल “स्कूटी दीदी” के नाम ले चिन्‍हें जाय लगिस।
साल 2023 म एनु ह “महिला दोपहिया प्रशिक्षण केंद्र” के स्थापना करिस। शुरुआत म केवल 2-3 महिला मन ह प्रशिक्षण लीन, फेर धीरे-धीरे ये पहल ग्रामीण समाज म एक क्रांति बन गीस। अब तक ओ 30 ले जादा महिला मन ल स्कूटी चलाना सिखा डरे हे, जेन अब खुद आंगनबाड़ी, स्कूल, बैंक अऊ स्वास्थ्य केंद्र जइसे स्थान मन तक स्वतंत्र रूप ले पहुँचना शुरू कर डरे हे।
एनु के ए पहल ले न केवल महिला मन के दैनिक गतिशीलता आसान हो गए हे, बल्कि पूरा सामाजिक दृष्टिकोण म घलोक बदलाव आए हे। अब गांव मन म माता-पिता खुद अपन बेटी मन अऊ बहु मन ल एनु तीर प्रशिक्षण बर भेजत हें। ओखर सपना हे के ओ 1000 महिला मन ल आत्मनिर्भर बनावय अऊ जल्‍दीच चारपहिया वाहन प्रशिक्षण केंद्र शुरू करय।
मुख्यमंत्री श्री विष्णु देव साय ह कहिन के एनु जइसे मनखे छत्तीसगढ़ के नवा पहिचान हे। राज्य सरकार ‘बिहान’ जइसे योजना मन के माध्यम ले अइसन नवाचार मन ल बढ़ावा देहे बर बाना उंचाए हे, जेन जमीनी स्तर म बदलाव लावत हे।
एनु के योगदान केवल ड्राइविंग प्रशिक्षण तक सीमित नइ हे। वो ह सिलाई-कढ़ाई, एलईडी असेंबली, मनरेगा काम मन, अऊ घरेलू प्रबंधन म घलोक महिला मन ल दक्ष बनाय हे। वोखर एदीम मन ल देखत भारत सरकार के ग्रामीण विकास मंत्रालय के संयुक्त सचिव श्रीमती स्वाति शर्मा अऊ धमतरी के कलेक्टर श्री अविनाश मिश्रा ह खुद उमरदा गांव जाके एनु ले मुलाकात करिन अऊ वोखर काम मन के सराहना करिन।
ग्रामीण विकास मंत्रालय, भारत सरकार ह घलोक एनु के कहानी ल फेसबुक पोस्ट के माध्यम ले साझा करत कहिस के जीवन म संसाधन मन के कमी रहिस, फेर एनु के हौसला ल कोनो डिगा नइ सकीस। वो ह एम.ए. के पढ़ाई पूरा करके ‘बिहान’ अऊ ‘प्रथम संस्था’ ले प्रशिक्षण प्राप्त करके न केवल आत्मनिर्भरता पाइस, बल्कि दूसर मन बर घलोक प्रेरणा बनिस।
मुख्यमंत्री श्री विष्णु देव साय ह कहिन के आज छत्तीसगढ़ के बेटी मन केवल लाभार्थी न ही, बल्कि बदलाव के वाहक बनत हें। राज्य सरकार हर अइसन पहल के स्वागत करही जेन महिला सशक्तिकरण ल गति देही।