मुख्यमंत्री दाउ भूपेश बघेल ह भारत स्काउट अउ गाइड्स छत्तीसगढ़ राज्य परिषद के नवा नेवरिया पदाधिकारी मन खवाइन किरिया

रइपुर, 22 जून 2021 मंगल । मुख्यमंत्री दाउ भूपेश बघेल ह आज भारत स्काउट अउ गाइड्स छत्तीसगढ़ राज्य परिषद के नवा नेवरिया पदाधिकारी के किरिया खवई के वर्चुअल कार्यक्रम म संघरीन । उन मन अपन घरू कार्यालय ले वीडियो कॉन्फ्रेंसिंग ले पदाधिकारी मन ल किरिया खवाईन अउ जम्मो नवा नेवरिया पदाधिकारी मन ल सफलतापूर्वक अपन दायित्व के निर्वहन बर बधई अउ शुभकामना दीन।
मुख्यमंत्री कहीन कि आप मन अइसन वैश्विक आंदोलन ल छत्तीसगढ़ म आगू बढ़ाए के जिम्मेदारी अपन खांध म ले है, जेकर शुरुआत 1907 म लार्ड वेडेन पॉवेल ह ब्रिटेन म करे रिहिन। स्काउटिंग मनखे के चरित्र निर्माण के आंदोलन हरे। एकर एक ठो सिद्धांत हे कि स्काउट सबका मितान होथे। हर स्काउट दूसर स्काउट के भाई होथे। ये सिद्धांत स्काउटिंग ल विश्व-बंधुत्व ले जोड़थे । विनम्रता, वफादारी अउ विश्वसनीयता हर स्काउट के गुण हरे।
भारत म ये आंदोलन स्वतंत्रता ले पहिलीच शुरु होगे रिहिसे। स्वतंत्र भारत में ‘भारत स्काउट्स एंड गाइड्स के स्थापना 7 नवम्बर, 1950 के पंडित जवाहरलाल नहेरू, मौलाना अबुल कलाम आजाद अउ मंगल दास पकवासा कोति ले करे गे रिहिस।
कार्यक्रम म छत्तीसगढ़ राज्य परिषद के अध्यक्ष के रूप म स्कूल शिक्षा मंत्री डॉ. प्रेमसाय सिंह टेकाम, विधायक अउ भारत स्काउट्स एवं गाइड्स के राष्ट्रीय उपाध्यक्ष श्री सत्यनारायण शर्मा अउ संसदीय सचिव अउ भारत स्काउट एवं गाइडस राज्य परिषद के राज्य मुख्य आयुक्त श्री विनोद सेवन लाल चंद्राकर ह तको नवा नेवरिया अधिकारी मन ल बधई अउ शुभकामना दीन।