बीजापुर, 21 अगस्त 2020। बीजापुर जिला म सरलग कतनो दिन ले बारिश होवत हे. तेरवा दिन के बारिश ह तबाही मचा दे हे. नदी नाला उफान म हे. जिला म बाढ़ के स्थिति हे. बाढ़ थमें के नाम नई लेवत हे. मिंगाचल, तालपेरु, चिंतावावु नदियां भयानक रूप लेवत जावत हे. मुख्यायल ले दूर नक्सल प्रकोप वाला क्षेत्र मन म कई ग्रामीण फंसे रिहिस. एसडीआरएफ के टीम ह रात म ही रेस्क्यू अभियान चलाके ग्रामीण मन ल सुरक्षित बाहर निकालिस.
बता देथन 2 दिन ले पुल टूटे के सेती ले 15 ग्रामीण उसरीबजार गांव म फंसे रिहिस. लगातार बाढ़ अउ बारिश के सेती ले हालात मुश्किल रिहिस. खबर आय हे कि 15 ग्रामीण जद्दोजहद करत मदद के इंतजार म हे. जेखर बाद तहसीलदार युगल किशोर के नेतृत्व म एसडीआरएफ के टीम ल लेके उसरीबाजर के डहर रेस्क्यू बर निकलिस.
रात करीब 7 बजे पूरा रेस्क्यू टीम बोट के सहायता ले रेस्क्यू बर निकलिस. नक्सल इलाका अउ घना अंधेरा होय के सेती ले सर्चलाईट अउ पेलिकेन लाइट सबले जादा कारगर साबित होइस. रात करीब 8 बजे एक घंटे के रेस्क्यू आपरेशन के बाद SDRF के टीम सबो 15 ग्रामीण मन ल सकुशल भैरमगढ़ लेके लहुटिस. उहें भारी बारिश के चलत नेशनल हाईवे घलो घंटों बन्द रिहिस. कतनो ग्रामीण मन के आशियाना बाढ़ ह उजाड़ दिस हे. बहुत से मवेशी अउ सैकड़ों एकड़ खेती बर्बाद हो चुके हे. बीजापुर कलेक्टर रितेश अग्रवाल ह लोगन मन ले अपील करे हे कि अनावश्यक बाढ़ ग्रस्त क्षेत्र या उफान वाला नदी नाला के डहर जाये ले बचें. कलेक्टर ह जनता ले सहयोग करे के अपील करे हे.
