– कलेक्टर ह नगरीय निकाय अउ खाद्य विभाग ल दीन हुकुम
दुर्ग 23 जुलाई 2020। लाकडाउन के बेरा म निराश्रित मनखे मन ल फूड पैकेट्स के जरूरत परही। एकरे संग म आपात स्थिति म मनखे मन ल मदद के जरूरत तको हो सकत हे। अइसन स्थिति म उनला जल्दी से जल्दी मदद पहुंचाना जरूरी होथे। पहिली घलव लाकडाउन के बेरा म आप मन सिस्टम तियार करे रहे होहु। एखर ले मिले अनुभव अउ आगू के रणनीति बनात लाकडाउन ल सफल बनाए के दिशा म काम करे के हुकुम कलेक्टर डॉ. सर्वेश्वर नरेंद्र भुरे ह अधिकारी मन के समीक्षा बैठक म दीस। उमन कहिन के कंट्रोल रूम चैबीसो घंटा चालू रइही। एमा आए फीडबैक के संबंध म आप मन ल अवगत कराए जाही जेमा तुरंते कारवाही ठउका करव।
17 ग्राम पंचायत मन म राशन के पुख्ता व्यवस्था करव- नगरीय इलाका म सटे 17 गांव म जिहा लाकडाउन प्रभावी रइही। उहां पंचायत म चावल के व्यवस्था पुख्ता रखे के निर्देश दिए गीस। उमन कहिन के निगम सरलग स्थिति के मानिटरिंग करयं अउ कोनो भी स्थिति म मनखे मन ल लाकडाउन के बेरा म तकलीफ झन होवय ये बात के धियान रखंय। बैठक म भिलाई नगर निगम कमिश्नर श्री ऋतुराज रघुवंशी, डीएफओ श्री केआर बढ़ाई, जिला पंचायत सीईओ श्री एस. आलोक, अपर कलेक्टर श्री बीबी पंचभाई एवं श्री प्रकाश सर्वे संग अउ आन अधिकारी मन उपस्थित रहिन।