रायपुर, 12 मार्च 2020। सीसल शिल्प के आकर्षक अऊ मनमोहक, सजावटी अऊ उपयोगी सामान महिला मन के पहली पसंद बन गए हे। लोकप्रियता के संगेच ए उत्पाद मन के मांग सरलग बाढ़त हे। छत्तीसगढ़ के संगेच प्रदेश के बाहिर म आयोजित होवइया हस्तशिल्प मेला मन म सीसल शिल्प के उत्पाद फ्रूट-ट्रै, हैंगर, बेबी डॉल, मैप, टी-कोस्टर, फूट-रेस्ट, पेपर होल्डर, मैगजीन-हैंगर आदि समान मन ल मनखे मन बिकट पसंद करत हें।
हस्तशिल्प विकास बोर्ड के अधिकारी मन ले मिले जानकारी के मुताबिक सीसल शिल्प के उत्पाद किफायती होए के संगें-संग आकर्षक अऊ मनमोहक रंग के सजावटी अऊ उपयोगी सामान होथे। छत्तीसगढ़ राज्य ह जनजातीय बाहुल्य होए के संगेच कई प्रकार के कला अऊ संस्कृति के विरासत रहे हे। जनजाति बाहुल्य जिला बस्तर के मुख्यालय जगदलपुर ले 15 किलोमीटर दूर परचनपाल ग्राम अऊ परचनपाल ले 5 किलोमीटर म कोल्चूर अऊ भरनी ग्राम स्थित हे जिहां म सीसल के प्लांटेशन वन विभाग कोति ले करे गए हे। सीसल एक पेड़ ये जेकर पाना ले रेसा निकाले जाथे। ये रेशा सफेद रंग के अऊ मजबूत होथे एखर से बनइया रस्सी के व्यावसायिक उपयोग समुद्री जहाज ल बांधे बर लंगर म करे जाथे। ये रस्सी पानी म कई महीना बुड़े रहे के बाद घलोक सरय नहीं। इही सीसल के रेशा ले कई प्रकार के सजावटी अऊ उपयोगी सामान के निर्माण शिल्पकार मन करथें। हस्तशिल्प विकास बोर्ड कोति ले स्थानीय युवक-युवती मन बर समय-समय म प्रशिक्षण कार्यक्रम आयोजित करे जाथे अऊ हस्तशिल्प प्रदर्शनी मन के माध्यम ले विपणन के सुविधा घलोक उपलब्ध कराए जाथे। हस्तशिल्प विकास बोर्ड कोति ले संचालित बस्तर जिला के परचनपाल शिल्पग्राम म सीसल शिल्प के काम करइया कई परिवार निवासरत हे।
