सूरजपुर, 26 मई 2020। सूरजपुर जिला के भटगांव थाना अंतर्गत ग्राम पंचायत चुनगढ़ी म आज एसईसीएल कर्मचारी के लाश सड़क के पाई म पड़े मिलीस। सूचना मिलतेच भटगांव पुलिस मौका म पहुंचीस। जानबा होए हे के मरने वाला जवान सोमवार रात के घर ले निकले रहिस अऊ आज भिनसरहा तक नइ लहुटे रहिस। वोकर परिवार वाले मन ह हत्या के आशंका जताए हें।
पुलिस के मुताबिक भटगांव थाना क्षेत्र अंतर्गत ग्राम चुनगढ़ी म आज भिनसरहा सड़क के पाई म खून ले सने लाश गांव वाले मन ह देखिन। जेखर बाद गांव वाले मन ह एखर सूचना पुलिस ल दीन। सूचना मिलतेच भटगांव पुलिस मौका म पहुंच के मौका मुआयना करके शव के पहिचान भटगांव के न्यू माइनस कॉलोनी निवासी भैया लाल साहू (40) के रूप म करे हे, जऊन एसईसीएल भटगांव क्षेत्र के 3/4 भूमिगत परियोजना म कोयला कर्मचारी के रूप म पदस्थ रहिस। ईही बीच घटना के जानकारी परिजन ल घलोक मिलीस। परिजन घलोक घटनास्थल पहुंचिन।
मृतक के पत्नी ह पुलिस ल बताइस के बीते रात करीबन 10 बजे के करीबन वोखर पति तीर ककरो फोन आए रहिस। जेखर बाद ओखर से मिले जाय के बात कहि के वो घर ले निकले रहिस। देर रात तक घर वापस नइ लहुटिस अऊ आज भिनसरहा वोखर मौत के खबर सुने ल मिलत हे। पत्नी ह पुलिस ले अंदेशा व्यक्त करे हे के ओखर पति के कोनो ह हत्या कर देहे हे। उन्हें पुलिस घलोक मामला म हत्या के आशंका व्यक्त करत हे।
dailychhattisgarh.com के खबर
