बिलासपुर, 26 अगस्त 2020। खेती-किसानी ल प्रोत्साहित करे अऊ फसल के उचित मूल्य देवाए के उद्देश्य ले शुरू करे गए ‘राजीव गांधी किसान न्याय योजना’ के दुसर किस्त मिले ले किसान मन उत्साहित हें। तिहार के बेरा म ये राशि मिले ले गांव वाले मन ल अपन जरूरत पूरा करे म आसानी होवत हे। बिलासपुर जिला के तखतपुर विकासखंड के ग्राम खरकेना के किसान श्री रतिराम ल ये योजना के तहत दूसर किस्त के रूप म 5 हजार 200 रूपिया मिलिस। एखर से खुश होके श्री रतिराम ह बताइस के ये राशि के उपयोग वो ह तिहार के समय अपन जरूरत बर खर्च करिस।
किसान श्री रतिराम तीर दू एकड़ खेत हे। खरीफ साल 2019-20 म रतिराम ह 29 क्विंटल 40 किलो धान समिति म समर्थन मूल्य म बेचे रहिस। ओला 1800 प्रति क्विंटल के हिसाब ले 38 हजार रूपिया ले कुछ जादा के राशि मिले रहिस। राजीव गांधी किसान न्याय योजना के तहत छत्तीसगढ़ शासन ह ओला 2500 रूपिया प्रति क्विंटल के हिसाब ले अंतर के राशि के भुगतान किस्त म करे जात हे। अभी तक वो ल दू किश्त के राशि 10 हजार 400 रूपिया मिले हे। लॉकडाउन के समय पहली किश्त के रूप म 5 हजार 200 रूपिया के राशि मिले ले ओखर परिवार बर एक बड़का सहारा होए रहिस हे। दूसर किश्त के राशि के रूप म ओला 5 हजार 200 रूपिया मिले हे। ये राशि ल ओ ह तिहार म खर्च करिस। राशि मिले म रतिराम ह शासन ल धन्यवाद दे हे।
