- मुख्यमंत्री सुपोषण अभियान के पहिली चरन म करीबन पांच हजार लइका मन ल सामान्य श्रेणी म लाय म मिले रहिस सफलता
- दुर्ग जिला के अभियान म नवाचार घलोक सामिल, हर महीना होवत हे वजन तिहार अऊ लइका मन के बढ़वार के रखे जात हे रिकार्ड
दुर्ग, 01 अगस्त 2020। मुख्यमंत्री श्री भूपेश बघेल ह प्रदेश म कुपोषण ले मुक्ति बर जउन उदीम करे जात हे वोला सबले पहिली प्राथमिकता देहे ल कहे हें। ए उदीम मुख्यमंत्री सुपोषण अभियान के नाम ले जाने जाथे, प्रदेश म ए ह एक सफल योजना के रूप म आगू आए हे। दुर्ग जिला म एकर पहिली चरण म 4800 लइका कुपोषण के दायरा ले बाहिर आए रहिन। अब बांचे लइका मन ल कुपोषण के दायरा ले निकाले बर मुख्यमंत्री सुपोषण अभियान के दूसर चरण के शुरूआत होवत हे। अवइया तीन सौ दिन के लक्ष्य लेके ये योजना म काम करे जाही। आज सबो जनप्रतिनिधि मन ह घर म लइका मन बर सुपोषण टुकनी देके ये योजना के शुरूआत करिन।
कलेक्टर डॉ. सर्वेश्वर नरेंद्र भुरे घलोक ग्राम अछोटी पहुंचिन। उहां उमन रूही देशमुख ल सुपोषण के टुकनी भेंट करिन। कलेक्टर ह ये मौका म लइका मन के परिवार ल कहिन के लइका के शुरूआती पांच साल ओखर आगू के भविष्य तय करथे। कहूं ये बेरा म लइका के पोषण के पूरा ध्यान रखे जाए त खच्चित लइका शारीरिक अउ मानसिक रूप ले मजबूत होथे, जेखर से ओखर भविष्य उज्ज्वल होथे। इही बात ल धियान म रखत आप मन ल सुपोषण टुकनी देहे गए हे। काबर के अभी आंगनबाड़ी केंद्र बंद हे अउ कार्यकर्ता मन आपके लइका बर घरे म रेडी-टू-ईट देहीं। कलेक्टर ह कहिन के मुख्यमंत्री श्री भूपेश बघेल ह हम सबो ल निर्देशित करे हें के कोनो लइका कुपोषित झन रहय। एखर खातिर हम डीएमएफ मद ले लइका मन के पोषण बर विशेष राशि के बिवस्था करे हवन। छै महिना ले तीन साल तक के लइका मन ल हम विशेष रूप ले गरम जेवन देबोन। अइसन लइका मन के संख्या जिला म सात हजार हे। अभी लाकडाउन हे ए खातिर सामान घरे म ही पंहुचा के देहे जाही। कलेक्टर ह कहिन के आंगनबाड़ी के दीदी मन आपके घर म भेंट करे आत रइहीं। आप मन उंखर सुझाव उपर अमल करव। एखर से लइका बहुत तेजी ले पोषित होही।
ये मौका म कलेक्टर ह आंगनबाड़ी नंबर 3 ल घलोक देखिन। उहां सुपोषण वाटिका देखके उमन खुशी जताईन। इहां भाजी अऊ पपीता के संग मुनगा के पौधा घलोक रोपे गए हे। उमन कार्यकर्ता मन के प्रशंसा करत कहिन के आप मन के काम देखके बहुत अच्छा लागत हे। उमन सरपंच श्री घनश्याम दिल्लीवार अऊ जनपद सदस्य श्री टिकेश्वरी लाल देशमुख ल घलोक बधाई दीन। उमन कहिन के जनप्रतिनिधि मन के सहयोग अऊ रुचि ले सुपोषण अभियान कारगर तरीका ले आगू बाढ़त हे। आप मन के हाथ म आप मन के गांव के उज्ज्वल भविष्य हे। ये दिशा म आप मन जतका काम करहू, गांव के भविष्य वोतकेच मजबूत होही। ये मौका म परियोजना अधिकारी श्री अजय साहू, सुपरवाइजर श्रीमती देवकी साहू, आंगनबाड़ी कार्यकर्ता दिनेश्वरी दिल्लीवार, आशालता दिल्लीवार अऊ माया रामटेके घलोक उपस्थित रहिन।