रायपुर, मुख्यमंत्री श्री भूपेश बघेल ह आज अपन भेंट-मुलाकात अभियान के दूसर चरण के शुरुआत करिन। भेंट-मुलाकात अभियान के दूसर चरण म मुख्यमंत्री श्री बघेल बस्तर संभाग के दौरा म हें। बस्तर के कोंटा विधानसभा ले उमन अभियान के शुरुआत करे हें। भेंट-मुलाकात बर मुख्यमंत्री श्री बघेल आज रायपुर ले कोंटा पहुंचिन।
मुख्यमंत्री ह घलोक जनसमूह के अभिवादन करिन। कोंटा म भेंट-मुलाकात ले पहिली मुख्यमंत्री श्री बघेल सबले पहिली श्री राम लिंगेश्वर मंदिर पहुंचिन अऊ मंदिर म खंभा, शिवलिंग व नंदी के पूजा-अर्चना करके आशीर्वाद लीन। उमन प्रदेशवासी मन के सुख, समृद्धि के कामना करिन। ये दौरान मुख्यमंत्री के संग वाणिज्य मंत्री श्री कवासी लखमा, सांसद श्री दीपक बैज घलोक उपस्थित रहिन। जानबा हे कि बस्तर संभाग म भेंट-मुलाकात अभियान के दूसर चरण म मुख्यमंत्री 18 ले 2 जून तक बस्तर के विधानसभा क्षेत्र मन के दौरा करगें। कोंटा विधानसभा क्षेत्र ले शुरुआत करत मुख्यमंत्री श्री बघेल श्री राम लिंगेश्वर मंदिर म पूजा-अर्चना के बाद सामुदायिक स्वास्थ्य केन्द्र के निरीक्षण करे ल पहुंचिन। इहां उमन स्वास्थ्य सुविधा मन के जायजा लीन। मुख्यमंत्री ह दवइ मन के उपलब्धता के जानकारी लीन। संगेच सामुदायिक स्वास्थ्य केन्द्र म मौजूद मरीज मन संग बइठ के उंखर मेर बातचीत करिन।
मुख्यमंत्री श्री भूपेश बघेल मरीज के संग बइठके करिन गोठ-बात
