बीज प्रक्रिया, आंगनबाडी, धान उपार्जन केंद्र संग हाट बाजार, क्लीनिक के करिन अवलोकन
रायपुर, कोरिया जिला के प्रभारी सचिव श्री नरेंद्र कुमार दुग्गा ह बुधवार के विकासखंड भरतपुर के ग्राम पंचायत हरचौका स्थित अंतर्राज्यीय बैरियर घुघरी के जांच करिन। उमन मध्यप्रदेश अउर छत्तीसगढ़ राज्य के सीमा म बने ये चेकपोस्ट म अवैध धान परिवहन ल रोके बर 24 घंटा सरलग निगरानी बर पारी मुताबिक अधिकारी मन अऊ कर्मचारी मन के डिउटी लगाय के हुकुम दीन। ये बेरा म उमन उहां संधारित फाईल मन के जांच करिन अऊ थाना प्रभारी ल सुरक्षा व्यवस्था दुरूस्त करे ल कहिन।
प्रभारी सचिव श्री दुग्गा ह छत्तीसगढ़ राज्य बीज अउर कृषि विकास निगम लिमिटेड अंतर्गत संचालित बीज प्रक्रिया केंद्र लोहारी के घलोक निरीक्षण करिस। ये दौरान उमन संबंधित अधिकारी ले किसान मन के संख्या, पंजीयन अउर शासन ले मिले टारगेट, गोदाम म रखे गये अनाज, गेंहू, उड़द, सरसों के खरीद के पंजीयन के जानकारी लीन। उमन बिल्डिंग मरम्मत कराए के संगें-संग संबंधित अधिकारी ले बीज उत्पादन समिति के जानकारी लेत जादा ले जादा बीज उत्पादन के काम करे ल कहिन। उमन खेत मन म जाके गेहूं के फसल के अवलोकन तको करिन।
श्री दुग्गा ह आंगनबाडी केंद्र चैनपुर पहुंचके अण्डा चिकी वितरण, एनिमिक महिला अऊ गर्भवती माता मन ल देवइया गरम जेवन, गंभीर कुपोषित ले मध्यम कुपोषित अउर सामान्य श्रेणी म आए लइका मन के जानकारी के अऊ संबंधित अधिकारी ल शासन के हुकुम के पालन करे बर कहिन। एखर बाद प्रभारी सचिव ह विकासखंड मनेन्द्रगढ के ग्राम रोकड़ा म आयोजित साप्ताहिक बाजार पहुंचके मुख्यमंत्री हाट बाजार क्लीनिक योजना के जायजा लीन। उमन उहां उपस्थित डाक्टर मन ले दवई मन के उपलब्धता सुनिश्चित करे के निर्देश दीन। ये मौका म श्री दुग्गा ह हाट बाजार क्लीनिक म अवइया मरीज मन ले चर्चा घलोक करिन। श्री दुग्गा ह आदर्श गौठान रोझी पहुंचके मवेशी मन के चारा के उपलब्धता, वर्मी कम्पोस्ट बिक्री, पैरादान आदि के जानकारी लेत दुग्ध पालक समिति बनाए, बकरी पालन बर शेड बनाए ल कहिन अऊ स्व-सहायता समूह के महिला मन ले चर्चा करके ओ मन ल आर्थिक सशक्तिकरण के जानकारी दीन।
दौरा के समय म प्रभारी सचिव कृषि ऊपज मंडी समिति चैनपुर अउर आदिम जाति सेवा सहकारी समिति माडीसरई अऊ धान उपार्जन केंद्र पटना पहुंचिन अऊ उहां किसान मन के टोकन, ऋण पुस्तिका, स्टेक होल्डिंग, नवा अउर जुन्ना बारदाना, स्टैपिंग, धान के उठाव, किसान मन के भुगतान, जब्त धान के जानकारी प्राप्त करिन। उमन उहां संधारित कागद मन ल अवलोकन करिन। उमन किसान अउर गांव वाले मन के समस्या सुनके संबंधित अधिकारी मन ल जरूरी हुकुम दीन। ये दौरान कलेक्टर श्री डोमन सिंह उपस्थित रहिन।