शिविर के निरीक्षण कर योजना मन के क्रियान्वयन के लीन जानकारी
स्वास्थ्य जांच कराए आए मनखे मन ले करिन बात, राशन कार्ड जल्दी बांटे के दीन निर्देश
रायपुर, 29 जुलाई 2024। जनसमस्या निवारण पखवाड़ा के दूसरइया दिन इतवार के नगरीय प्रशासन अउ विकास विभाग के सचिव डॉ. बसवराजु एस., संचालक श्री कुंदन कुमार अऊ कलेक्टर डॉ. गौरव सिंह रायपुर नगर निगम के वार्ड नंबर 27, इंदिरा गांधी वार्ड म आयोजित शिविर म पहुंचिन। डॉ. बसवराजु ह हर एक विभाग मन के स्टॉल म पहुंचके जानकारी लीन। नगर निगम के आयुक्त श्री अबिनाश मिश्रा घलोक ए बेरा म मौजूद रहिन।
नगरीय प्रशासन विभाग के सचिव डॉ. बसवराजु ह राशन कार्ड के जल्द ले जल्द नवीनीकरण कर हितग्राही मन ल वितरित करे के निर्देश दीन। उमन महिला अउ बाल विकास विभाग के स्टॉल म पहुंचके पूरक पोषण आहार के संबंध म जानकारी लीन। उमन महतारी वंदन योजना के तहत प्राप्त आवेदन मन के तकनीकी समस्या ल दूर करके आवेदक मन ल योजना के लाभ देवाए के निर्देश दीन। उमन पीएम स्वनिधि योजना के स्ट्रीट वेंडर्स ल जादा ले जादा लाभ देवाए ल कहिन। संगेच योजना के तहत जादा ले जादा मनखे मन ल लाभ देवाए अऊ ऋण के वापसी ऑनलाइन या गूगल-पे ले कराए संबंधी निर्देश दीन, ताकि हितग्राही मन ल बार-बार बैंक जाय के जरूरत झन परय।
विभागीय सचिव डॉ. बसवराजु ह पेयजल ले संबंधित समस्या मन के जल्दी निराकरण के निर्देश दीन। संगेच घर अउ बड़े संस्थान मन म वाटर हार्वेस्टिग सिसटम लगाय बर प्रेरित करे ल कहिन। जल ल बचाय के उपाय बतात सिसटम जादा ले जादा जगह म लगाय के निर्देश दीन। उमन स्वास्थ्य शिविर म पहुंचके आम नागरिक मन ले बात करिन अऊ शिविर म ही दवा उपलब्ध कराए के निर्देश दीन। सनिवार के इंदिरा गांधी वार्ड के शिविर म 20 ले जादा नागरिक मन के आधार कार्ड अऊ 16 मनखे मन के आयुष्मान कार्ड बनाय गीस। इहां आयोजित स्वास्थ्य शिविर म 42 मनखे मन के स्वास्थ्य परीक्षण करे गीस। उहें मोबाइल मेडिकल यूनिट के माध्यम ले घलोक 87 मनखे मन के स्वास्थ्य के जांच करे गीस।
